काठमाडौं। लामो समयदेखि बेलायती गोर्खाहरूको समस्या समाधान हुन नसकेको अवस्थामा परराष्ट्रमन्त्री शिशिर खनालले बेलायतसँग वार्ता गरेका छन्। बेलायती रक्षामन्त्री जोन हिली र भूतपूर्व सैनिक तथा जनशक्तिसम्बन्धी मन्त्री लुइस स्यान्डर जोन्ससँग भर्चुअल बैठक गरी गोर्खा भर्तीबारे छलफल गरेका हुन्।
बैठक मुख्यतः बेलायती गोर्खाहरूका लामो समयदेखि समाधान हुन बाँकी रहेका गुनासाहरू, समानुपातिक पेन्सनको मागलगायत विषयमा केन्द्रित रहेको परराष्ट्र मन्त्रालयले जनाएको छ।
त्यस अवसरमा मन्त्री खनालले नेपाल–बेलायत सम्बन्धमा बेलायती गोर्खाहरूको महत्त्वलाई प्रकाश पार्दै बेलायती गोर्खाहरूका गुनासाहरूको यथाशीघ्र आपसी स्वीकार्य समाधान खोज्नुपर्ने आवश्यकतामा जोड दिए।
साथै, उनले न्याय, निष्पक्षता र सम्मानको दृष्टिकोणबाट यी विषयहरू सम्बोधन गर्न बेलायती सरकारसँग अनुरोध गरेका थिए। बैठकमा रक्षामन्त्री हिलीको तर्फबाट स्यान्डर जोन्सले बेलायती गोर्खा भूतपूर्व सैनिकका विषयहरू सम्बोधन गर्न नेपाली पक्षसँग नजिकबाट सहकार्य गर्ने आफ्नो प्रतिबद्धता पुनः व्यक्त गरे।
बैठकमा परराष्ट्र सचिव अमृतबहादुर राई तथा परराष्ट्र मन्त्रालयका अन्य वरिष्ठ अधिकारीको उपस्थिति थियो। बेलायती पक्षबाट सांसद एलेक्स बेकर, सांसद तथा नेपालसम्बन्धी सर्वदलीय संसदीय समूहका अध्यक्ष, साथै बेलायतको रक्षा मन्त्रालयका अन्य वरिष्ठ अधिकारीहरू उपस्थिति रहेको मन्त्रालयले जनाएको छ।
बैठकमा बेलायती गोर्खा संगठनहरूका प्रतिनिधिहरूको पनि उपस्थिति थियो। यसअघि मन्त्री खनालले बेलायती गोर्खा भूतपूर्व सैनिकका प्रतिनिधिसँग भर्चुअल अन्तरक्रिया गरेका थिए।
उक्त बैठकको समन्वय तथा सहजीकरण लण्डनस्थित नेपाली राजदूतावासका कार्यवाहक राजदूत बिपिन दुवाडीले गरेका थिए।
