वैशाखमा महँगी बढ्यो, भारतभन्दा नेपालमा मुद्रास्फीति उच्च

अर्थतन्त्र

गृहपृष्ठ
अर्थतन्त्र

वैशाखमा महँगी बढ्यो, भारतभन्दा नेपालमा मुद्रास्फीति उच्च

क्यापिटल नेपाल मंगलबार, जेठ २६, २०८३

काठमाडौं। चालु आर्थिक वर्ष २०८२/८३ को वैशाखमा वार्षिक बिन्दुगत उपभोक्ता मुद्रास्फीति ५.०४ प्रतिशत पुगेको छ। गत वर्ष सोही अवधिमा यो २.७७ प्रतिशत मात्रै रहेको थियो।

नेपाल राष्ट्र बैंकले सार्वजनिक गरेको वर्तमान आर्थिक तथा वित्तीय स्थिति प्रतिवेदनअनुसार खाद्य तथा पेय पदार्थ समूहको मुद्रास्फीति ४.६३ प्रतिशत तथा गैरखाद्य तथा सेवा समूहको ५.२६ प्रतिशत रहेको छ। यद्यपि चालु आवको १० महिनाको औसत मुद्रास्फीति २.६६ प्रतिशतमा सीमित छ, जुन अघिल्लो वर्ष ४.३९ प्रतिशत थियो।

वैशाखमा फलफूलको मूल्य १८.६० प्रतिशतले बढेर सबैभन्दा धेरै महँगिएको छ। घिउ तथा तेल, तरकारी र माछामासुको मूल्य पनि उल्लेख्य रूपमा बढेको छ। गैरखाद्यतर्फ विविध वस्तु तथा सेवा तथा यातायात भाडादरमा उच्च वृद्धि देखिएको छ।

भौगोलिक आधारमा तराई क्षेत्रमा सबैभन्दा बढी ५.५९ प्रतिशत मुद्रास्फीति रहेको छ भने काठमाडौं उपत्यकामा ४.९० प्रतिशत, पहाडमा ४.७३ प्रतिशत र हिमालमा ३.७३ प्रतिशत रहेको छ। प्रदेशगत रूपमा कोशीमा सबैभन्दा बढी ५.६४ प्रतिशत र बागमतीमा सबैभन्दा कम ४.५५ प्रतिशत मुद्रास्फीति रहेको छ।

राष्ट्र बैंकका अनुसार वैशाखमा नेपालको मुद्रास्फीति ५.०४ प्रतिशत रहँदा भारतको मुद्रास्फीति ३.४८ प्रतिशत मात्रै रहेकाले नेपालमा महँगी दर छिमेकी भारतभन्दा उच्च देखिएको छ।

प्रकाशित मिति: मंगलबार, जेठ २६, २०८३ १८:३६

प्रतिक्रिया दिनुहोस्