अस्ट्रिच अवलोकनले फस्टाउँदै घरबास

account_box क्यापिटल नेपाल ,
प्रकाशित: २०७६ असार २२, आइतबार ,१०:५४:AM  
अस्ट्रिच अवलोकनले फस्टाउँदै घरबास

बाँके । बैजनाथ गाउँपालिका–१ गाभरमा रहेको अस्ट्रिच फार्म अवलोकन गर्न दैनिकजसो आन्तरिक पर्यटक पुग्ने गर्छन् । 


अस्ट्रिच फार्म अवलोकन गर्न १०० को टिकट काट्नुपर्छ । टिकट काटेर फार्मभित्र पुगेपछि अष्ट्रिचसँग रमाउन पाइन्छ । यहाँ अस्ट्रिच फार्म सञ्चालनपछि पहिले सुनसान रहेको बस्तीमा अहिले चहलपहल सुरु भएको छ ।


गाउँमा अहिले दैनिक २० देखि २५ आन्तरिक पर्यटक आउँछन् । खप्तड उद्यम व्यापार केन्द्र (अस्ट्रिच फार्म) का व्यवस्थापक मनिराज जोशीका अनुसार फार्म हेर्न आउनेको घुइँचो लाग्न थालेपछि घरबास (होमस्टे)को व्यापारमा सुधार आएको छ । पाँच बिघा क्षेत्रफल २० वर्षका लागि भाडामा लिएर फार्म सञ्चालन गरिएको छ । 


अस्ट्रिच फार्ममा घुमेर निस्किने पर्यटकहरु खानपान र आरामका लागि बाँसले बेरेर निर्माण गरिएका होमस्टेमा पुग्छन् । मौलिक थारू परिकार खान्छन्, आराम गर्छन् । ‘नमूना थारू होमस्टेमा आउने पर्यटकले अस्ट्रिच अवलोकन र थारू परिकारको स्वाद पाइरहेका छन्’, होमस्टे सञ्चालक बाबुराम चौधरीले भने । 

    
अस्ट्रिचको मासु खानेदेखि हेर्न र अध्ययन गर्न विद्यार्थी आउने गरेको जोशीले सुनाउनुभयो । एउटा अस्ट्रिचबाट ८० देखि एक क्विन्टलसम्म मासु उत्पादन हुन्छ । प्रतिकिलो रु एक हजारमा बिक्री गर्दै आएका उनले व्यापारमा कुनै घाटा नलागेको बताए । 


फार्ममा सुरुमा १५० अस्ट्रिच थिए । अहिले बिक्री भएर २० छन् । चाडपर्व र हिउँदका महीनामा पर्यटकको चाप बढी हुने गर्छ । यतिबेला आन्तरिक पर्यटककै भरमा फार्म र होमस्टे धानिएको जोशीले बताए । सुनसान ठाउँमा अस्ट्रिच पाल्न थालेपछि होमस्टेको सम्भावना देखेर चौधरीले पनि होमस्टे सञ्चालन गरेको बताए ।

 

होमस्टे सुरु गरेपछि चौधरी सुरुमा हाँसोका पात्र बनेका थिए ।  व्यापार जम्दै गएपछि छिमेकी बुजौना थारू, बालकृष्ण थारू, बुजावन चौधरीले समेत होमस्टे सञ्चालन सुरु गरेका छन् । 

    
मेघराज चौधरीले अलपत्र जमीनमा टावरसहितको आधुनिक होमस्टे निर्माण सुरु गरेका छन् । साथी गगन चौधरीको साझेदारीमा झन्डै ६० लाख लगानी गरेको उनले बताए । बाँके निकुञ्ज नजिकै रहेका होमस्टेमा वन्यजन्तु अवलोकन गर्न पाइन्छ । रासस

क्यापिटल नेपाल

थप

expand_more
प्रतिक्रिया दिनुहोस
सम्बन्धित समाचार

क्याटेगोरी पर्यटन बाट थप

Top // $this.children('p:not(:first-child)').wrapAll('
');