निगमका अध्यक्ष खरेल एक साता बिदामा, उनलाई हटाउने रणनीतिमा चार आकाङ्क्षी

account_box सुवास योञ्जन ,
प्रकाशित: २०७६ साउन २६, आइतबार ,०६:२२:PM  
निगमका अध्यक्ष खरेल एक साता बिदामा, उनलाई हटाउने रणनीतिमा चार आकाङ्क्षी

काठमाडौं । वित्तीय अवस्थामा घाटा खाइरहेको नेपाल वायु सेवा निगममा रणनीतिक साझेदार ल्याउने अन्तिम तयारी भइरहेका बेला निगमका कार्यकारी अध्यक्ष मदन खरेललाई पदबाट हटाउने तयारी भएको छ । 

२०७५ भदौ ३१ गते निगमको अध्यक्षमा नियुक्त भएका खरेललाई ११ महिनापछि हटाउन लबिङसमेत सुरु भएको हो । खरेल अहिले गत शुक्रबारदेखि एक साताका लागि बिदामा बसेका छन् । 

खरेल प्रधानमन्त्री केपी शर्मा ओलीको ठाडो निर्देशनमा अध्यक्षमा नियुक्त भएका थिए । प्रधानमन्त्रीको विश्वासपात्रका रुपमा मानिएका खरेल प्रधानमन्त्रीकै गृहजिल्ला झापा निवासी हुन् । अध्यक्षमा नियुक्तिकै बेला जिल्लाबासीलाई च्यापेको भन्दै प्रधानमन्त्री ओलीको आलोचनासमेत भएको थियो ।

नेपाल एयरलाइन्सलाई नयाँ धारमा लैजान योजना बनाइरहेको बेला अध्यक्षलाई हटाउन लागिएको भन्दै निगमका केही कर्मचारी रुष्ट भएका छन् ।

निगमको अध्यक्षका लागि तत्कालीन महाप्रबन्धक सुगतरत्न कंसाकार, क्याप्टेन केबी लिम्बु, पूर्वमहाप्रबन्धक बालकृष्ण (बीके)मान सिंह र हाल विज्ञका रुपमा नियुक्त भएका राजुबहादुर केसीले दौडधुप सुरु गरिरहेका छन् । तीमध्ये कंसाकार र सिंह पूर्व माओवादी निकट हुन् भने लिम्बु पूर्व एमाले र केसी भने तटस्थ देखिन्छन् ।

अध्यक्ष बन्न दौडधुप गरेका आकाङ्क्षीहरुले नै खरेलका बारे पर्यटनमन्त्रीलाई ब्रिफिङ गरिरहेको निगम स्रोतले क्यापिटल नेपाललाई जानकारी दियो । 

अध्यक्षमा नियुक्त भएको केही महिनाभित्रै खरेलले निगमको स्वेतपत्र जारी गरेका थिए । स्वेतपत्रमा खरेलले निगमको अवस्थालाई सार्वजनिक गरेका थिए । उनले निगम सुधारका लागि हालको अवस्था यस्तो छ, र आगामी दिनमा यस्ता किसिमका काम गर्ने भनेर सार्वजनिक गरेका थिए ।

अहिले निगमको किस्ता नियमित तिर्न नसकेको, वाइडबडी जहाजले लामो दुरीमा उडान गर्न नसकेको र आन्तरिक उडानलाई प्रभावकारी बनाउन नसकेको आरोप खरेलमाथि छ । यी तीन ओटै विषय आफू अध्यक्ष भएर आउनुअघि नै निगममा समस्याका रुपमा देखिएको खरेल बताउँछन् ।  

‘वाइडबडी जहाजको बिजनेस प्लान नै नबनाएर जहाज खरिद गरिएको थियो,’ उनले भने, ‘जब जहाज नै उड्दैनन्, आम्दानी हुँदैन, त्यसैले पनि किस्ता तिर्न समस्या भएको हो ।’

सुवास योञ्जन

क्यापिटल नेपालका संवाददाता हुन्

थप

expand_more
प्रतिक्रिया दिनुहोस
सम्बन्धित समाचार

क्याटेगोरी पर्यटन बाट थप

Top // $this.children('p:not(:first-child)').wrapAll('
');