एटीएम ह्याक प्रकरण : प्रहरीको साइबर अपराध अनुसन्धान ब्युरोलाई सक्रिय बनाइने

account_box क्यापिटल नेपाल ,
प्रकाशित: २०७६ भदाै २५, बुधबार,०३:५९:PM  
एटीएम ह्याक प्रकरण : प्रहरीको साइबर अपराध अनुसन्धान ब्युरोलाई सक्रिय बनाइने

काठमाडौं । भदौ १४ गते शनिबार चिनियाँ ह्याकरहरुले नेपालका विभिन्न एटीएम बुथबाट पैसा चोरी गरेपछि बैङ्किङ क्षेत्रमा हलचल मच्चिएको छ । 

चोरी गरिरहेकै बेला बैङ्कले प्रहरीलाई खबर गरेपछि चिनियाँ ह्याकरहरु पक्राउ परेका थिए । त्यसयता प्राविधिक क्षेत्रमा सुरक्षा अपनाउन राष्ट्र बैङ्कदेखि प्रहरीसम्म तातेका छन् । नेपाल प्रहरीअन्तर्गत साइबर अपराध नियन्त्रणका लागि गठन भएको विभागलाई सक्रिय बनाइने प्रहरी केन्द्रीय अनुसन्धान ब्युरो (सीआईबी)ले जनाएको छ ।

सीआईबीले स्थापना कालदेखि नै गम्भीर खालका अपराधको अनुसन्धान गर्दै आएको छ । पछिल्लो समय नेपालमा साइबर तथा प्रविधिसम्बन्धी अपराध बढेकाले प्रहरीले त्यस्ता घटना नियन्त्रण गर्न छुट्टै ब्युरो गठन गरेर अनुसन्धान थालेको हो । गत १४ भदौमा एटीएम ह्याक भएपछि यस ब्युरोलाई थप क्रियाशील बनाइएको सीआईबीका प्रवक्ता दीपक रेग्मीले बताए । 

विश्वमा नयाँ नयाँ प्रविधिको विकास भइरहेको छ । नेपालले सबैभन्दा पछि विकास भएका प्रविधि प्रयोग गर्न नसकेकाले पनि अपराधहरु बढेको सीआईबीको बुझाइ छ । साथै नेपालमा खुला सीमाका कारण कसुर गरेर भाग्न सजिलो हुने भएकाले पनि पछिल्ला दिनमा एटीएम ठगीका घटना फस्टाउन थालेको सीआईबीले जनाएको छ । 

करिब २ हप्ताअघि चिनियाँ ह्याकरहरुले नेपालका ७ ओटा बैङ्कका विभिन्न कार्ड प्रयोग गरी विभिन्न स्थानका ६८ ओटा एटीएमबाट १ करोड ८९ लाख ४४ हजार ५ सय तथा भारतका विभिन्न स्थानका १३२ एटीएमबाट नेपाली बैङ्कको १ करोड ५ लाख ८७ हजार २ सय गरी कुल ३ करोड ५८ लाख ८४, हजार २० रुपैयाँबराबरको रकम झिकिएको थियो । यो एटीएम ह्याकको घटनाको अनुसन्धान काठमाडौं प्रहरी परिसरले गरिरहेको छ । यसअघि एटीएम ह्याकसम्बन्धी घटनाको अनुसन्धान सीआईबीले गर्दै आएको थियो ।

सीआईबीको पछिल्लो तथ्याङ्कअनुसार हालसम्म एटीएमको दुरुपयोग गरी २ करोड ५७ लाख ४४ हजार ४ सय ३१ रुपैयाँ ठगी भएको भन्दै बिगो दाबी गरिएको छ । आर्थिक वर्ष २०७०÷७१ मा एटीएमबाट ७ लाख रुपैयाँबराबरको ठगी भएकोमा आर्थिक वर्ष २०७४÷७५ मा आइपुग्दा झन्डै ३ करोड रुपैयाँ ठगी भएको देखिएको छ । चार वर्षको अन्तरालमा साढे २ करोड रुपैयाँभन्दा बढी ठगी भएको सीआईबीको तथ्याङ्कले देखाउँछ । एटीएम ठगीमा नेपालीको तुलनामा विदेशी बढी छन् ।

सीआईबीले १४ ओटा कारबाहीमा ६ जना नेपाली, ४ जना रोमानियन, ४ जना टर्किस, ४ जना बुल्गिेरियन, २ जना भारतीय र ४ जना मोल्दोभियन गरी जम्मा २४ जना नागरिकलाई सीआईबीले प्रकाउ गरेको छ । जसमध्ये विदेशी नागरिक १८ जना छन् । सीआईबीले हालसम्म ९५ लाख ६२ जार ८ सय ५० रुपैयाँ, अमेरिकी डलर ७५ हजार २ सय २५, युरो ७३ हजार ८ सय ७५, इन्डोनेसियन रुपी ३३ हजार, फिलिपिनी करेन्सी ४ सय ७० तथा १ हजार ३ सय ६९ थान एटीएम कार्ड बरामद गरेको जनाएको छ । 

विदेशी नागरिकहरु प्रविधिमा नेपालीका तुलनामा पोख्त छन् । त्यसैको फाइदा उठाउँदै विदेशी नागरिकले मास्टर कार्डको प्रयोग गरेर एटीएमबाट पैसा झिक्ने गरेको प्रवक्ता रेग्मीले बताए । उनका अनुसार नेपालका सीमा खुला भएकाले पनि ठगी गरेर भाग्न सजिलो हुने हुँदा विदेशीहरु एटीएम ठगीमा आकर्षित हुने गरेको अनुसन्धानमा खुलेको छ ।

ठगी गरेर हवाई यातायातबाट जान नपाए पनि खुला सीमाका कारण भाग्न भारतीय बाटो प्रयोग गर्ने गरेको उनले बताए । खुला सीमाका कारण भाग्न सजिलो हुने भएकाले पनि नेपालमा ठगी गर्न बढी सुरक्षित मानिएकाले एटीएम ठगी बढेको प्रवक्ता रेग्मीको भनाइ छ । 

बैङ्किङ कसुर तथा सजाय ऐन, २०६४ मा कसैले पनि क्रेडिट कार्ड, डेबिट कार्ड, अटोमेटेड टेलर मेशिन (एटीएम) कार्ड वा अन्य विद्युतीय माध्यमको दुरुपयोग वा अनधिकृत प्रयोग गरी भुक्तानी लिन वा दिन हुँदैन भन्ने उल्लेख छ । यदि कसैले त्यस्तो काम गरेमा कानुबमोजिम कारबाही हुने ऐनमा उल्लेख छ ।

प्रतिक्रिया दिनुहोस
सम्बन्धित समाचार

क्याटेगोरी मुख्य समाचार बाट थप

Top // $this.children('p:not(:first-child)').wrapAll('
');