काठमाडौं । ‘योगदानमा आधारित सामाजिक सुरक्षा योजना’ कार्यान्वयनमा समस्या आएपछि नेपाल उद्योग परिसंघका प्रतिनिधिले श्रम तथा रोजगार मन्त्रालयका सचिवलाई भेटेका छन ।
परिसंघका अध्यक्ष सतिश मोरले मन्त्रालयका सचिव विनोद केसीसँग आइतबार भएको भेटमा सामाजिक सुरक्षा कार्यक्रम कार्यान्वयन तहमा देखिएका समस्या समाधानका लागि थप पहल लिन आग्रह गरेको हो ।
परिसंघका अध्यक्ष मोरले सामाजिक सुरक्षा योजना कार्यान्वयनमा देखिएका समस्या समाधानका लागि परिसंघको विशेषज्ञ कार्यदलले तयार गरेको लिखित सुझाव यसअघि नै पेश गरे पनि त्यस अनुसार समस्या समाधान नभएकाले थप पहल गर्न आग्रह गरेका थिए ।
अध्यक्ष मोरले योगदानकर्ता श्रमिकले पाउने प्रतिफल र वित्तीय सुरक्षा, दोहोरो कर तथा कोषले योगदानकर्ताका लागि दिने लगानी नीतिका बारेमा छिटो निर्णयमा पुग्न आवश्यक रहेको तर्फ मन्त्रालयको ध्यान पुग्नु पर्ने बताए ।
सामाजिक सुरक्षाका अलावा आन्तरिक तथा बाह्य क्षेत्रमा रोजगारीका अवसर सृजनामा सरकारसँग थप सघन सहकार्यका लागि परिसंघ तयार रहेको पनि अध्यक्ष मोरले उल्लेख गरे ।
सो अवसरमा परिसंघका उपाध्यक्ष राजेश अग्रवालले परिसंघले दिएका सुझाव कार्यान्वयन भए श्रमिकले पाउने प्रतिफल र वित्तीय सुरक्षा ग्यारेन्टी हुने र कार्यक्रम प्रभावकारी कार्यान्वयन हुन सक्ने बताए ।
सचिव केसीले पसिसंघका सुझावबारे मन्त्रालय गम्भिर रहेको र कार्यक्रमलाई प्रतिफलमुखी बनाउदै जान पहल भइरहेको जानकारी गराए । श्रम सचिव केसीले श्रम बजारलाई व्यवस्थित गर्न तथा रोजगारीको अवसर सृजना गर्न परिसंघसँगको सहकार्य बढाउदै जाने प्रतिवद्धता पनि व्यक्त गरेका थिए ।
यस अघि पनि परिसंघले सामाजिक सुरक्षा तथा श्रमसँग जोडिएका विषयमा रोजगारदाता तथा श्रमिकहरुका सुझावहरु समेटेर परिसंघले श्रम मन्त्रालयमा सुझाव प्रतिवेदन पेश गरेको थियो ।