भारतले निकासी रोकेको भोलिपल्ट नेपालमा प्याज महंगियो, एकैदिन बढ्यो १५ रुपैयाँ

account_box हरिप्रसाद शर्मा ,
प्रकाशित: २०७७ भदाै ३०, मङ्गलबार,१०:२२:AM  
भारतले निकासी रोकेको भोलिपल्ट नेपालमा प्याज महंगियो, एकैदिन बढ्यो १५ रुपैयाँ

काठमाडौं । भारतले निकासी बन्द गरेको भोलीपल्ट नै नेपालमा प्याजको मूल्य बढ्न थालेको छ । भारतले सूचना प्रकाशित गरी सोमबारदेखि प्याज निकासी रोकेको हो । प्रतिवन्ध लगाएको भोलीपल्ट बुधबार प्याजको खुद्रामूल्य  प्रतिकिलो १५ रुपैयाँसम्म बढेको छ ।

काठमाडौं उपत्यकाको सबैभन्दा ठूलो तरकारी बजार कालीमाटीमा प्याजको मूल्य ह्वात्तै बढेको हो । कालीमाटी तरकारी बजारमा मंगलबार ५९ रुपैयाँमा बिक्री भइरहेको प्याज बुधबार मूल्य बढेर किलोको ७५ रुपैयाँ पुगेको हो । भारतले प्याज निकासी बन्द गरेपछि प्याजको मुल्य अझै आकासिने देखिएको छ । 

यो पनि पढ्नुस 
प्याज निकासीमा भारतले लगायो बन्देज, नेपालमा भाउ बढ्ने संभावना
 

‘मंगलबार भन्दा बुधबार कालीमाटीमा प्याजको मूल्य बढेको छ । खुद्रा मुल्यमा नै ५९ रुपैयाँमा बिक्री भएको प्याज एकैदिन ७५ रुपैयाँ पुगेको छ’ कालीमाटी फलफुल तथा तरकारी विकास समितिका सुचना अधिकारी विनय श्रेष्ठ भन्छन्, ‘भारतले प्याज निकासीमा प्रतिवन्ध लगाएकै कारणले यो मूल्य बढेको देखिन्छ ।’

स्वदेशी उत्पादन नहुँदा बढ्दो परनिर्भरताका कारण हरेक वर्ष प्याजको मूल्य घट्ने बढ्ने हुने गरेको श्रेष्ठको भनाई छ । भारतले निकासी बन्द गरेपछि प्याज मंहगो मात्र नभएर अभाव नै हुने उनी बताउँछन् ।

भारतले उत्पादन कम भएका कारण अभाव हुन थालेको भन्दै निकासीमा बन्देज लगाएपछि नेपालमा चाडपर्वकै मुखमा प्याजको मूल्य आकासिने देखिएको छ । 

श्रेष्ठका अनुसार, अझैपनि प्याजको मूल्य बढ्ने र चीनबाट महंगोमा आयात हुने सम्भावना रहेको बताउँछन् । नेपालमा चिनिँया प्याज त्यति आयात हुँदैन् । 

नेपालमा भारतीय प्याजले नै बजार ओगटेको छ । गत वर्ष मंसिरमा पनि प्याज निकासीमा बन्देज लगाएपछि नेपाली बजारमा प्याजको भाउ आकासिएको थियो । योसँगै चाडवाडका बेला प्याजको भाउ बढ्ने भएको छ । 

भारतले प्याज निकासी रोकेपछि व्यापारीहरु लुकीछिपी कालोबजारी गर्ने सम्भावना रहेको उपभोक्ताकर्मी बताउँछन् । 
सरकारको स्पष्ट आपूर्ति नीति नहुँदा उपभोक्ता सधैं ठगिने गरेको उपभोक्ताकर्मी माधव तिमल्सिना बताउँछन् ।

प्याजकै कुरामा पनि सरकारले उत्पादन बढाउने नीति लिएपनि उत्पादन बढाउन नसक्दा भारतमा निर्भर हुनु परेको छ । भारतले निकासी रोक्दा बित्तिकै प्याजको अभाव र मूल्य आकासिएको उनको तर्क छ । 

कालीमाटी तरकारी बजारमा मात्रै ८० प्रतिशत भारतीय प्याजको कारोबार हुने गर्छ । नेपालमा प्याजको उत्पादन नगन्य मात्रामा हुन्छ । नेपालमा प्याजमा परनिर्भरकै अवस्थामा छ । 

भारतबाट प्याज नआएमा चीनबाट महंगोमा आउन सक्ने श्रेष्ठको भनाई छ । नेपालमा बर्षेनी भारतबाट झन्डै ४ अर्ब रुपैयाँको प्याज आयात हुने गरेको छ ।

हरिप्रसाद शर्मा

क्यापिटल नेपालका संवाददाता हुन् 

थप

expand_more
प्रतिक्रिया दिनुहोस
सम्बन्धित समाचार

क्याटेगोरी कर्पोरेट बजार बाट थप

Top