मङ्गलबार, जेठ ४ २०७८ १०:२२ AM

×

बेलायत–भारत व्यापार सम्झौता, १ अर्ब ४० करोड अमेरिकी डलर 

images

रासस/एपी।  बेलायतले भारतसँग करिब (१ अर्ब पाउन्ड) अर्थात् १ अर्ब ४० करोड अमेरिकी डलर बराबरको नयाँ व्यापार तथा लगानी सम्झौता घोषणा गरेको छ । 

नयाँ व्यापार एवं लगानी सम्झौतामा कोभिड–१९ र अन्य रोग विरुद्धका खोप उत्पादनमा सघाउन भारतस्थित खोप उत्पादक कम्पनी सेरम इन्स्टिच्युटलाई थप मद्दत गर्नेसमेत उल्लेख छ । 

बेलायती प्रधानमन्त्री बोरिस जोन्सन र भारतीय प्रधानमन्त्री नरेन्द्र मोदीबीच मंगलबार भएको भिडियो कन्फरेन्स बैठक अघि बेलायतका तर्फबाट यस्तो घोषणा गरिएको हो । यस बैठकमा दुई देशबीच स्वतन्त्र व्यापार सम्झौताका लागि सम्झौताहरु हुने अनुमान गरिएको छ । 

बेलायत सरकारले युरोपेली युनियनबाट अलग भएपछि विभिन्न देशसँग व्यापार वृद्धिका लागि सम्झौताहरु गर्न थालेको छ ।  सोमबार अबेर घोषणा गरिएको बेलायतको यस घोषणाले बेलायमा ६ हजार ५ सयभन्दा बढी रोजगारी सिर्जना हुने बेलायत सरकारको अपेक्षा छ । 

यस प्याकेजअन्तर्गत सेरमको बेलायतस्थित प्लान्टमा २४ करोड पाउन्ड स्टर्लिङ लगानी गरिने छ जसबाट क्लिनिकल ट्रायल, अनुसन्धान र खोप उत्पादनमा खर्च गरिनेछ । सेरम इन्स्टिच्युटले कोडाजेनिक्ससँगको साझेदारीमा कोभिड–१९ विरुद्ध एक डोज लगाए पुग्ने खोपको विकास गर्न थालेको छ । नाकबाट दिइने यो खोपको परीक्षण प्रारम्भिक अवस्थामै रहेको छ ।

प्रधानमन्त्री जोन्सनले विज्ञप्तिमा भनेका छन्, “बेलायत–भारत सम्बन्धका विभिन्न आयाम रहेझैं यस लगानीबाट दुई देशका हाम्रा जनतालाई थप बलियो र सुरक्षित बनाउनेछ । यस लगानीबाट सिर्जना हुने ६ हजार ५ सय नयाँ रोजगारीले बेलायती र भारतीय परिवारलाई लाभ पुग्नेछ ।”

बेलायत र भारतबीचको वार्षिक व्यापार करिब २३ अर्ब पाउन्डको छ । यो युरोपेली युनियनसँग बेलायतको व्यापारभन्दा ५ प्रतिशत मात्र कमी हो । 

मङ्गलबार २१ बैशाख २०७८ ०५:०२ PM मा प्रकाशित

प्रतिक्रिया