आयआर्जन गर्न एकल महिलालाई तालिम

रिब्दीकोट गाउँपालिका आयोजना र गाउँपालिका स्तरीय एकल महिला सञ्चालको संयोजनमा सञ्चालित तालिममा सीप पाएपछि उनीहरु खुशी बनेका छन् । 

पाल्पा । एकल महिलाले आयआर्जन गरी जीवनस्तर उकास्नका लागि परालको जुत्ता बनाउने सीप पाएका छन् । रिब्दीकोट गाउँपालिका आयोजना र गाउँपालिका स्तरीय एकल महिला सञ्चालको संयोजनमा सञ्चालित तालिममा सीप पाएपछि उनीहरु खुशी बनेका छन् ।

गाउँपालिकाभित्रका २५ एकल महिलाले पहिलो पटक सीप सिक्न पाएपछि खुशी भएका हुन् । तालिममा सिकेको सीप घरमा बसेर पनि जुत्ता बनाएर बेच्न सक्ने छन् । तालिम समापनमा रिब्दीकोट गाउँपालिका अध्यक्ष नारायणबहादुर जीसीले सीप सिकेर घरमा बसेर पनि आम्दानी गर्न सक्ने बताए । एकल महिलाले स्थानीय स्रोतसाधनको प्रयोग गरी जुत्ता उत्पादन, झिनीया, ढाका सिलाएर राम्रो पैसा कमाउन सक्ने अध्यक्ष जीसीले बताए ।

गाउँपालिका उपाध्यक्ष लक्ष्मी खनालले महिलाले आयआर्जन गरी आत्मनिर्भर बन्न आवश्यक रहेकाले सीपको खाँचो रहेको बताइन् । प्रशिक्षक गोमा अर्यालले सिकेको सीप प्रयोग गरेमा प्रशस्त पैसा कमाउन सकिने बताइन् ।

रैनादेवी छहरा गाउँपालिकाकी महिला विकास शाखाकी पवित्रा परियारले सीप पाएपछि महिलामा अब केही गरौँ भन्ने उत्साह थपिएको बताइन् । रासस