मुग्लिनमा खसी बोका खरीद बिक्री केन्द्र स्थापना, एकैदिन ६१ खसीबाेका बिक्री

account_box क्यापिटल नेपाल ,
प्रकाशित: २०७६ भदाै २२, आइतबार ,०९:५८:AM  
मुग्लिनमा खसी बोका खरीद बिक्री केन्द्र स्थापना, एकैदिन ६१ खसीबाेका बिक्री

मुग्लिन । चितवनको इच्छाकामना गाउँपालिकामा खसी बोका खरीद बिक्री केन्द्र स्थापना गरिएको छ ।

वडा नं ६ मा रहेको चण्डिभञ्ज्याङ महिला उद्यमी सहकारी संस्था लिमिटेडले किसानहरुको सहजताका लागि मुग्लिन नजिकै कालिखोलामा पहिलोपटक खसीबोका खरीद बिक्री केन्द्रको स्थापना गरेको हो ।

केन्द्रको शनिबार इच्छाकामना गाउँपालिका अध्यक्ष गीताकुमारी गुरुङले एक कार्यक्रमबीच उद्घाटन गरिन् । साे क्रममा उनले गुणस्तरीय उत्पादन गर्न सकेमा बजारीकरणको समस्या नहुने र किसानले पनि आफ्नो उत्पादनको मूल्य राम्रो लिन सक्ने भएकाले व्यावसायिक बाख्रापालन गर्ने किसानका लागि गाउँपालिकाले अनुदान उपलब्ध गराउँदै आएको बताइन् । 

विभिन्न संस्थासँगको साझेदारीमा पाँच लाख ५० हजार रूपैयाँकाे लागतमा खसी बोका खरीद बिक्री केन्द्र निर्माण गरिएको महिला उद्यमी सहकारी संस्था लिमिटेडका अध्यक्ष रश्मी गुरुङले जानकारी दिइन् । 

गुरुङका अनुसार खसी बोका बिक्री केन्द्र निर्माणका लागि इच्छाकामना गाउँपालिकाको दुई लाख ५० हजार रूपैयाँ, हेफर इन्टरनेशनलको दुई लाख रूपैयाँ र सहकारीको एक लाख रूपैयाँ लगानी परेको छ ।

खसी बोका खरीद बिक्री केन्द्रको सञ्चालनसँगै किसानको उत्पादनलाई बजारीकरणमा सहजता हुने र किसानले पनि राम्रो मूल्य पाउने अपेक्षा गरिएको अध्यक्ष गुरुङले बताइन् । 

यसैबीच सहकारीले निर्माण गरेको खसीबोका खरीद बिक्री केन्द्रको उद्घाटनको पहिलो दिन शनिबार करीब ६१ खसी बोका बिक्री भएको र सोबाट करीब नौ लाख रूपैयाँकाे कारोबार भएको जनाएकाे छ ।

केन्द्रमा ४० किलोभन्दा माथिको खसी बोकाको ५०० रूपैयाँ प्रतिकिलो, ३० देखि ४० किलोसम्मको ४७० रूपैयाँ र २० देखि ३० किलोसम्मको ४५० रूपैयाँ प्रतिकिलो बिक्री मूल्य निर्धारण गरिएको छ ।

यहाँका अधिकांश किसानले खेतीपातीसँगै आर्थिक आम्दानीका लागि बाख्रापालन पनि गर्दै आएका छन् । खसी बोका खरीद बिक्री सङ्कलन केन्द्र निर्माण भएपछि किसानलाई सहजता भएको छ । रासस

प्रतिक्रिया दिनुहोस
सम्बन्धित समाचार

क्याटेगोरी प्रदेश -३ बाट थप

Top // $this.children('p:not(:first-child)').wrapAll('
');