जाजरकोट भूकम्पका लाभग्राही ८० हजार पुगे

समाज

गृहपृष्ठ
समाज

जाजरकोट भूकम्पका लाभग्राही ८० हजार पुगे

क्यापिटल नेपालशुक्रबार, माघ ५, २०८०

काठमाडौं–जाजरकोट भूकम्पमा परी प्रभावित भएका लाभग्राहीको संख्या पुनः थपिएसँगै ७९ हजार पाँच सय ९९ पुगेको तथ्यांक गृह मन्त्रालयले सार्वजनिक गरेको छ। पछिल्लो पटक १२ हजार बढी लाभग्राही थपिएका छन्।

पहिचान हुन बाँकी रहेका लाभग्राहीलाई स्थानीय तहले पहिचान गरेर तथ्यांक पठाएपछि लाभग्राहीको संख्या ७९ हजार पाँच सय ९९ पुगेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ।

यसअघि ६७ हजार लाभग्राही रहेकामा माघ ४ सम्म पहिचान भएकाको संख्या थप भएको प्राधिकरणको निजी आवास तथा पुनःनिर्माण शाखाका प्रमुख प्रकाशचन्द्र अधिकारीले बताए। प्राधिकरणले यसअघि लाभग्राही ८० हजार एक सय ५० पुग्ने अनुमान गरेकामा अहिले सोही हाराहारी कायम भएको उनले बताए।

अधिकारीका अनुसार सरकारले लाभग्राहीका लागि अहिलेसम्म २ अर्ब २६ करोड निकासा गरिसकेको छ। उनीहरुको अस्थायी आवासका लागि चार अर्ब ७५ लाख चाहिने अनुमान यसअघि नै गरिएको थियो। सो आधारमा अझै रकम आवश्यक देखिएको छ।

केन्द्रबाट निकासा गरी पठाइएको रकममध्ये आजसम्म जिल्ला विपद् व्यवस्थापन समितिबाट स्थानीय तहको विपद् व्यवस्थापन समितिमा एक अर्ब ९० करोड गएको र स्थानीय तहबाट लाभग्राहीको खातामा एक अर्ब २६ करोड पुगिसकेको प्राधिकरणका प्रमुख कार्यकारी अधिकृत अनिल पोखरेलले बताए।

उनका अनुसार हालसम्म ५० हजार लाभग्राहीको खातामा रकम पुगिसकेको छ। त्यसमध्ये २४ हजार १० लाभग्राहीको अस्थायी आवास निर्माण सम्पन्न भएको पोखरेलको भनाइ छ। उनका अनुसार अहिले १० हजार घर निर्माण जारी रहेको छ।

बाँकी परिवारमा अनुदान सम्झौताको चरणमा रहेको छ। जाजरकोट केन्द्रविन्दु भएर गत कात्तिक १७ मा जनधनको क्षति हुनेगरी भूकम्प गएको थियो।

प्रकाशित मिति: शुक्रबार, माघ ५, २०८० १२:५९

प्रतिक्रिया दिनुहोस्