लुम्बिनी सेरामिक्सको लेमिनार टायल्सलाई तीन विधामा आईएसओ प्रमाणपत्र

उद्योग

गृहपृष्ठ
उद्योग

लुम्बिनी सेरामिक्सको लेमिनार टायल्सलाई तीन विधामा आईएसओ प्रमाणपत्र

क्यापिटल नेपाल बुधबार, कात्तिक ७, २०८१

काठमाडाैं। लेमिनार टायल्स उत्पादक कम्पनी लुम्बिनी सेरामिक्सले आईएसओ मापदण्ड पालना गरी विश्वस्तरीय भिट्रिफाइड टायलको उत्पादनको प्रमाणीकरण हासिल गरेको छ।

नेपालको सबैभन्दा पहिलो शतप्रतिशत भिट्रिफाइड टायल ब्रान्ड लेमिनार उत्पादनमा आएको केही सातामै आईएसओ प्रमाणपत्र प्राप्त गर्ने राष्ट्रकै सम्भवतः पहिलो कम्पनी बन्न सफल भएको छ लुम्बिनी सेरामिक्सको दाबी छ।

लुम्बिनी सेरामिक्सले गुणस्तरीय व्यवस्थापन प्रणालीका लागि आईएसओ ९००१ः२०१५, वातावरणीय व्यवस्थापन प्रणालीका लागि आईएसओ १४००१ः२०१५ र व्यावसायिक स्वास्थ्य एवं सुरक्षा व्यवस्थापन प्रणालीका लागि आईएसओ ४५००१ः२०१८ गरी तीन विधामा प्रमाणपत्र पाएको हो।

चुस्त व्यवस्थापन अभ्यास, कर्पोरेट सुशासन र अन्तर्राष्ट्रिय रुपमा प्रचलित उत्पादनको सिद्धान्त एवं मान्यतालाई अंगीकार गरी नेपाललाई विश्वव्यापी उत्पादन अभ्यासको मापदण्डमा उभ्याउने उद्देश्यले लुम्बिनी सेरामिक्स स्थापना भएको कम्पनीका प्रबन्ध निर्देशक आशुतोष खेतानले बताए। ‘गुणस्तरीय वस्तु उत्पादन र वितरणलाई सुनिश्चित गर्न निरन्तर रुपमा गुणस्तर नियन्त्रण र व्यवस्थापन प्रक्रियालाई थप मजबुत बनाउँदै लैजानेछाैं’, उनले भने।

बर्दियाको गुलरियास्थित साढे १२ बिघामा फैलिएको युरोपेली गुणस्तरको अत्याधुनिक प्रविधियुक्त उत्पादन केन्द्रबाट लेमिनार टायल्स उत्पादन भइरहेको छ।

प्रकाशित मिति: बुधबार, कात्तिक ७, २०८१ १२:५८