सडक कालोपत्रको काम अलपत्र,वडाध्यक्षले गरे विरोध

पूर्वाधार

गृहपृष्ठ
पूर्वाधार

सडक कालोपत्रको काम अलपत्र,वडाध्यक्षले गरे विरोध

क्यापिटल नेपालसोमबार, फागुन १९, २०८१

काठमाडौं। कञ्चनपुरको कृष्णपुर नगरपालिका–२ का वडाध्यक्ष अर्जुन साउँदले कालोपत्रको माग गर्दै सडकमै बसेर वडा कार्यालयको सेवा प्रवाह गरिरहेका छन्। ठेक्का सम्झौता भएको लामो समयदेखि बंक–नायल–बुडर सडक कालोपत्रको कार्य नभएपछि त्यसको विरोध गर्दै उनले वडा कार्यालयको सेवा सडकबाटै दिन थालेका हुन्।

वडाध्यक्षले निर्माण व्यवसायी र पूर्वाधार विकास कार्यालयलाई दबाब दिनका लागि सडकको प्रवेश विन्दुमै टेबुल राखेर सेवा प्रवाह गरिरहेको बताए। कालोपत्र गर्ने कार्यको सुनिश्चितता नहुँदासम्म सडकमै बसेर सेवा प्रवाह गर्ने उनको भनाइ छ।

“पटक–पटक सडक स्तरोन्नती र कालोपत्रका लागि ठेक्का सम्झौताको म्याद थप्ने कार्य बाहेक सडक कालोपत्र कार्यको प्रगति हुनसकेको छैन”वडाध्यक्ष साउँदले भने,“सडकका खाल्डाखुल्डी पुर्ने कार्यमै बजेट सिध्याइने गरिएको छ, त्यस भन्दा बाहेकको कार्य प्रगति हुन सकेको छैन।”

जन दबाब बढन थालेपछि सडकमै कालो ब्यानर राखेर कालोपत्रका लागि सडकमा उत्रिनु परेको उनले बताए। चैत महिनासम्म ठेक्को म्याद थप भएकाले बिचमै ठेक्का तोडेर अर्कोलाई दिन नसकिने भएकाले तोकता गर्दै आएको उनको भनाइ छ। सडक निर्माणका लागि सन्तोषी थेगिम जेभीसँग २०७७ साउन २० गते ठेक्का सम्झौता भई २०८१ वैशाखमा म्याद सकिएको थियो।

२०८२ चैत ३० गते सम्मका लागि म्याद थप भए पनि सडक स्तरोन्नती तथा कालोपत्रको कार्य अहिलेसम्म पूरा हुनसकेको छैन। सडक निर्माणको हालसम्म ३५ प्रतिशत मात्रै प्रगति भएको छ। ११ करोड ८६ लाखमा सात किलोमिटर सडक कालोपत्रका लागि ठेक्का सम्झौता भएको थियो। ठेक्का सम्झौता भएको चार वर्ष बिते पनि कार्य अलपत्र परेको छ।

प्रकाशित मिति: सोमबार, फागुन १९, २०८१ ११:००

प्रतिक्रिया दिनुहोस्