सामाजिक सुरक्षा कोषबाट १ अर्ब ४३ करोड दाबी भुक्तानी

मुख्य समाचार

गृहपृष्ठ
मुख्य समाचार

सामाजिक सुरक्षा कोषबाट १ अर्ब ४३ करोड दाबी भुक्तानी

क्यापिटल नेपाल शनिबार, असार ४, २०७९

काठमाडाैं । सामाजिक सुरक्षा कोषले सामाजिक सुरक्षा योजनाअन्तर्गत हालसम्म योगदानकर्तालाई झण्डै डेढ अर्ब भुक्तानी गरिसकेको छ । कोषले यही असार २ गतेसम्म योगदानकर्तालाई विभिन्न सुविधा शीर्षकमा १ अर्ब ४३ करोड ५३ लाख रूपैयाँ भुक्तानी गरेको हो ।

कोषले औषधि उपचार, स्वास्थ्य तथा मातृत्व योजनाअन्तर्गत १० हजार ५९६ योगदानकर्तालाई १९ करोड ४५ लाख ६ हजार ९ सय ७९ रूपैयाँ र ४ सय ९६ योगदानकर्तालाई दुर्घटना तथा अशक्तता सुरक्षा योजनाबापत १ करोड ९१ लाख ३१ हजार १ सय ६ रूपैयाँ दाबी भुक्तानी दिएकोे हो ।

आश्रित परिवार सुरक्षा योजनाअन्तर्गत २१० योगदानकर्ताका परिवारलाई ३ करोड ३ लाख ६६ हजार ३ सय ९३ रूपैयाँ र वृद्ध अवस्था सुरक्षा योजनाबापत १७ हजार ७ सय ७२ योगदानकर्तालाई १ अर्ब १९ करोड १३ लाख १८ हजार ५ सय ७० रूपैयाँ भुक्तानी गरिएको कोषले जनाएको छ ।

कोषले योगदानकर्तालाई चार वटा सुविधा उपलब्ध गराउँदै आएको छ ।विसं २०६७ चैत ७ गते स्थापना भएको कोषले २०७५ मङ्सिर ११ गतेदेखि योजना कार्यान्वयनमा ल्याएको थियो । रोजगारदाताका तर्फबाट २० र श्रमिकको ११ प्रतिशत गरी २१ प्रतिशत रकम कोषमा जम्मा गर्नुपर्छ ।

त्यसरी जम्मा गरिएको योगदान रकममध्येबाट एक प्रतिशत औषधि उपचार स्वास्थ्य तथा मातृत्व सुरक्षा योजना, एक दशमलव चार प्रतिशत दुर्घटना र अशक्तता सुरक्षा योजना, शुन्ना दशमलव २७ प्रतिशत आश्रित परिवार सुरक्षा योजना र २८दशमलव ३३ प्रतिशत वृद्धावस्था सुरक्षा योजनामा बाँडफाँट हुनेछ ।

वृद्धावस्था सुरक्षा योजनाअन्तर्गतको २८दशमलव ३३ प्रतिशतमध्येबाट निवृत्तिभरण योजनामा २० प्रतिशत र अवकाश योजनामा आठ दशमलव ३३ प्रतिशत जम्मा हुने व्यवस्था मिलाइएको छ । निवृत्तिभरण योजनामा जम्मा भएको रकम निश्चित समयपछि योगदानकर्ताले आवश्यक परेको अवस्थामा निकाल्न सक्नेछन् ।कोषमा हालसम्म १८ अर्ब ८३ करोड रूपैयाँ योगदान रकम सङ्कलन भएको छ ।

जेठ मसान्तसम्म कोषमा ३ लाख ४० हजार ८ सय ४६ योगदानकर्ता सूचीकृत भएका छन् । सो अवधिमा १७ हजार १ सय ३० रोजगारदाता आबद्ध भएको कोषले जनाएको छ ।

प्रकाशित मिति: शनिबार, असार ४, २०७९ १६:११

प्रतिक्रिया दिनुहोस्