सन्तोषजनक काम नगर्ने १० निर्माण कम्पनी कालोसूचीमा

पूर्वाधार

गृहपृष्ठ
पूर्वाधार

सन्तोषजनक काम नगर्ने १० निर्माण कम्पनी कालोसूचीमा

क्यापिटल नेपाल बुधबार, फागुन २८, २०८१

काठमाडौं। सरकारले सन्तोषजनक काम नगर्ने १० निर्माण कम्पनीलाई कालोसूचीमा राखेको छ। प्रधानमन्त्री कार्यालय मातहतको सार्वजनिक खरिद अनुगमन कार्यालयले आज सूचना जारी गर्दै ती निर्माण कम्पनीलाई कालोसूचीमा राखिएको जानकारी दिएको छ।

जसमा गणेश तङनामी नेतृत्वको तारालक्ष्मी निर्माण सेवा गुल्मी र अनिल बस्नेतको ममता मञ्जु कन्स्ट्रक्सन प्रालि काठमाडौंलाई डेढ वर्षका लागि कालोसूचीमा राखिएको कार्यालयले बताएको छ। सो कम्पनीलाई कालोसूचीमा राख्न गुल्मीको धुर्कोट गाउँपालिका कार्यालयले सिफारिस गरेको थियो।

कार्यालयका अनुसार सुवोध खतिवडाको सनम निर्माण सेवा संखुवासभा, कमल सापकोटाको निर्जरा निर्माण सेवालाई एक वर्षका लागि कालोसूचीमा राखिएको छ। ती कम्पनीलाई सभापोखरी गाउँपालिका कार्यालयले कालोसूचीमा राख्न सिफारिस गरेको हो।

यसैगरी डोटीको शिखर नगरपालिका ९ स्थित सीताराम माविको सिफारिसमा अशोक गैरेको इन्द्रेणी बिल्डर्स एण्ड सप्लायर्स प्रालि काठमाडौं एक वर्षका लागि कालोसूचीमा परेको छ। कार्यालयका अनुसार सशस्त्र प्रहरी बलको ९ नम्बर गण हेडक्वाटर महोत्तरीको सिफारिसमा गोपाल प्रसाद दाहालको जीएस निर्माण संसार कम्पनी र कमान सिंह लामाको कमन कन्स्ट्रक्सनलाई पनि एक वर्षका लागि कालोसूचीमा राखिएको छ।

भिमबहादुर सावदको राजेन्द्र निर्माण सेवा, रविन कुमार जोशीको रफिना एण्ड कन्स्ट्रक्सन र सुरेश कुमार सिलवालको राम निर्माण कन्स्ट्रक्सन एक वर्षका लागि कालोसूचीमा परेको कार्यालयले जनाएको छ। ती कम्पनीलाई पुरातत्व विभागले कालोसूचीमा राख्न सिफारिस गरेको हो।

उक्त कम्पनीले कालोसूचीमा परेको अवधिभर सार्वजनिक निकायको कुनै पनि खरिद प्रक्रियामा भाग लिन नपाउने कार्यालयको सूचनामा उल्लेख छ।

Black-Listed-Company.-1741761203.jpg