झापा। संघ, प्रदेश र स्थानीय तहको लगानीमा बिर्तामोड नगरपालिकामा १४ किलोमिटर सडक धमाधम कालोपत्रे भइरहेको छ।
सडक डिभिजन कार्यालयका सब–इन्जिनियर मदन साहका अनुसार हर्कलाल मार्ग, बुट्टाबारी (प्याकुरेल चोक) सडक, गोकुल जोशी मार्ग र सहिदचन्द्र मार्ग सडकको स्तरोन्नति अन्तिम चरणमा पुगेको छ । नगरका २, ३, ४, ६, ७ र ९ नम्बर वडालाई जोड्ने ती सडकको निर्माण लागत १ अर्बभन्दा बढी छ।
चालू आर्थिक वर्षमा सम्पन्न गर्ने लक्ष्यका साथ धमाधम कालोपत्रे भइरहेको छ । विश्व बैंकको आर्थिक सहयोग रहेको वडा नम्बर ६, ७ र ८ जोड्ने ६ किलोमिटर २५८ मिटर लामो सडकमा हाल कालोपत्रे भइरहेको छ। जेठ तेस्रो सातासम्ममा निर्माण सम्पन्न हुने आरपी समता जेभीका मनोज उप्रेतीले बताए।
यो सडक आरपी समता जेभीले ५८ करोडमा निर्माणको ठेक्का लिएको हो। बिर्तामोड नगरपालिकालाई हल्दीबारी गाउँपालिकासँग जोड्ने सहिद चन्द्रमार्गको दुई किलोमिटर सडक आगामी १५ दिनभित्र सम्पन्न गर्ने लक्ष्यका साथ तीन खण्डमा कालोपत्रे भइरहेको छ।
दुई किलोमिटर लामो उक्त सडकको पहिलो खण्डमा पाँच करोड ६० लाखको ठेक्का सिद्धिथुम्का एभरग्रिन जेभीले, दोस्रो खण्डमा ट्रस्ना निर्माण सेवाले ६८ लाखमा र तेस्रो खण्डमा नाम्लाक निर्माण सेवाले १ करोड पाँच लाखमा निर्माणको जिम्मा लिएको छ।
वडा नम्बर २ देखि ३ हुँदै कनकाई नगरपालिका जोड्ने चारपाने–घैलाडुब्वा एक किलोमिटर सडकको ६ करोडको ठेक्कामा शान्ति निर्माण सेवा प्रालिले धमाधम निर्माण गरिरहेको वडाध्यक्ष किशोर बुढाथोकीले बताए।
बिर्तामोड–४ स्थित हर्कलाल मार्गको स्तरोन्नति तीन खण्डमा भइरहेको छ। प्रदेश र नगरपालिकाको लगानीमा निर्माणाधीन उक्त सडकको बीचको खण्डमा कालोपत्रे भइसकेको छ भने पहिलो र अन्तिम खण्डमा काम जारी छ। उक्त सडकको पहिलो खण्ड १ करोड १३ लाख, दोस्रो खण्ड ६ करोड र अन्तिम खण्ड १ करोड ११ लाखमा ठेक्का लागेको हो।
कोसी प्रदेश सरकार र बिर्तामोड नगरपालिकाको २ करोड ६० लाख समपूरक बजेटबाट दाहाल गाउँबाट लालमाटी चोक पश्चिम खण्डसम्म एक किलोमिटर क्षेत्रमा स्तरोन्नति कार्य धमाधम भइरहेको छ। केही दिनमा सडक कालोपत्रे गरिने निर्माण व्यवसायी दिनेश मैनालीले जानकारी दिए।
बिर्तामोड नगरपालिका प्रमुख पवित्रा प्रसाईँले सडक स्तरोन्नतिको निरन्तर अनुगमन भइरहेको बताइन्।–रासस
