तल्लो स्वराडमा विद्युत् विस्तार धमाधम

पूर्वाधार

गृहपृष्ठ
पूर्वाधार

तल्लो स्वराडमा विद्युत् विस्तार धमाधम

क्यापिटल नेपालबुधबार, जेठ १४, २०८२

बैतडी। बैतडीको दुर्गम तल्लो स्वराड क्षेत्रमा विद्युत् विस्तार धमाधम भइरहेको छ। यहाँका तीन स्थानीय तह मेलौली नगरपालिका, शिवनाथ गाउँपालिका र पञ्चेश्वर गाउँपालिकामा विद्युत् विस्तारको काम धमाधम भइरहेको हो।

‘उज्यालो पञ्चेश्वर’ बनाउने उद्देश्यले यहाँ विद्युत् विस्तारको काम धमाधम भइरहेको पञ्चेश्वर गाउँपालिकाका अध्यक्ष गोरखबहादुर चन्दले बताए। गाउँपालिकाले आफ्नो नीति तथा कार्यक्रममा उज्यालो पञ्चेश्वरलाई प्राथमिकता दिएको र सोहीअनुसार कार्यक्रम अघि बहिरहेको हो।

उनले भने, ‘नेपाल विद्युत् प्राधिकरणको केन्द्रीय लाइन विस्तार अन्तिम चरणमा पुगेको छ। गाउँपालिकाभित्र पाँच हजार घरधुरी रहेकोमा चार हजार बढी घरधुरीमा विद्युत् सेवा पुगिसकेको छ। उज्यालो पञ्चेश्वरको सपना थियो, पूरा हुने तयारीमा छ।’

पञ्चेश्वर गाउँपालिकामा आर्थिक वर्ष २०७७/७८ देखि विद्युत् प्राधिकरणले लाइन विस्तारको काम गरिरहेको छ। चार करोड ९३ लाखको ठेक्कामार्फत पञ्चेश्वरमा विद्युतीकरणको काम भइरहेको र गाउँपालिकाको वडा–२ मा केही दिनभित्रै बिजुली बत्ती बाल्ने तयारी भएको अध्यक्ष चन्दले बताए। वर्षांदेखि टुकीको भरमा बस्नुपर्ने बाध्यता अन्त्य भएको स्थानीय नरेन्द्र चन्दले सुनाए।

विद्युत विस्तार भएसँगै यहाँका नागरिक खुसी भएका छन्। विद्युत् प्राधिकरण बैतडी वितरण केन्द्रका प्रमुख जनार्दन पौडेलले जिल्लाका विद्युत् सेवा सबै नागरिकको पहुँचमा पुर्याउने लक्ष्य रहेको बताए।-रासस

प्रकाशित मिति: बुधबार, जेठ १४, २०८२ ०७:२४

प्रतिक्रिया दिनुहोस्