लगानी बोर्डको बैठक: मुक्तिनाथको केबलकारदेखि १२ सय मेगावाट जलविद्युत परियोजनाको लगानी स्वीकृति

पूर्वाधार

गृहपृष्ठ
पूर्वाधार

लगानी बोर्डको बैठक: मुक्तिनाथको केबलकारदेखि १२ सय मेगावाट जलविद्युत परियोजनाको लगानी स्वीकृति

क्यापिटल नेपाल बिहीबार, जेठ २२, २०८२

काठमाडौं। लगानी बोर्ड नेपालको ६४ औँ बैठकले मुक्तिनाथ केबलकार परियोजनाको लगानी स्वीकृति गरी परियोजना अघि बढाउने निर्णय गरेको छ।

बोर्डका अध्यक्षसमेत रहेका प्रधानमन्त्री केपी शर्मा ओलीको अध्यक्षतामा बिहीबार प्रधानमन्त्री निवास बालुवाटारमा बसेको बैठकले पर्वतको सेराफाँट (वीरेठाँटी-नयाँ पुल)देखि मुस्ताङको मुक्तिनाथसम्म सात स्थानमा स्टेशनसहित ८१ दशमलव ०४१ किलोमिटरको लामो केबलकार निर्माणका लागि लगानी स्वीकृत भएको हो।

यसका लागि ५७ अर्ब ६४ करोड ३७ लाख रुपैयाँ लागत रहने जनाइएको छ। यो परियोजनाको सम्पूर्ण काम मुक्तिनाथ दर्शन प्रालिले निर्माण गर्न प्रस्ताव गरेको थियो।

बैठकले उक्त प्रालिसँग परियोजना विकासको सम्झौताको शर्त आदि विषयमा वार्ता गर्न बोर्डका प्रमुख कार्यकारी निर्देशक सुशील ज्ञवालीको संयोजकत्वमा समिति गठन गरेको छ।

यस्तै, बैठकले ७५० मेगावाट क्षमताको एक खर्ब ६० अर्ब लगानी रहने पश्चिम सेती जलाशययुक्त आयोजनाको विस्तृत प्रतिवेदन (डिपिआर) थप अध्ययन गर्ने, नेपालमा रेलमार्ग क्षेत्रमा सहकार्यका लागि अध्ययन गर्न दक्षिण कोरियाको कोरेल संस्थासँग गरिने सम्झौताको मस्यौदा मन्त्रिपरिषदबाट स्वीकृति लिने निर्णयसमेत गरेको छ।

बैठकले ४३ दशमलव २ मेगावाटको छिलुङ खोला जलविद्युत आयोजना, २१६ मोगावाटको बझाङ माथिल्लो सेती जलविद्युत आयोजना र ४४ मोगावाटको बकान खोला जलविद्युत परियोजनाको लगानी स्वीकृतिको निर्णय भएको छ।

प्रकाशित मिति: बिहीबार, जेठ २२, २०८२ १७:४४

प्रतिक्रिया दिनुहोस्