कांग्रेस महाधिवेशन: प्रतिनिधिहरूले गर्ने निर्णय स्वतः मान्य हुने, आयोग अध्ययनमा

राजनीति

गृहपृष्ठ
राजनीति

कांग्रेस महाधिवेशन: प्रतिनिधिहरूले गर्ने निर्णय स्वतः मान्य हुने, आयोग अध्ययनमा

क्यापिटल नेपाल आइतबार, पुस २७, २०८२

काठमाडौं। नेपाली कांग्रेसको विशेष महाधिवेशन शुरु भएसँगै निर्वाचन आयोग सम्भावित विवाद समाधानका लागि पूर्वतयारीमा जुटेको छ। आयोगका उच्च अधिकारीहरूले कांग्रेसको विधान, राजनीतिक दल सम्बन्धी ऐन र विगतका नजिरहरूको गहन अध्ययन शुरु गरेका छन्। विशेष महाधिवेशनबाट आउन सक्ने जुनसुकै प्रकारको विवादको समाधानका लागि आयोग तयार हुन यो अध्ययन जरुरी भएको एक अधिकारीले बताए।

"विवाद आइपुगे कस्ता खालका मुद्दा आउन सक्छन् भन्ने पूर्वअनुमान गरी आयोगले आफूलाई तयार राख्नु स्वभाविक हो," आयोगका एक अधिकारीले भने। महाधिवेशनले केन्द्रीय समिति संशोधन, विधान परिमार्जन, नाम, चुनाव चिह्न वा झण्डामा परिवर्तन जस्ता जुनसुकै निर्णय गरे पनि त्यसको अद्यावधिकका लागि आयोगमा आउने भएकाले तयारी आवश्यक भएको हो।

नेतृत्व परिवर्तन वा अन्य नीतिगत विषयमा संशोधनका निर्णयहरूले वैधता पाउने विधि र प्रक्रिया प्रचलित ऐन र कांग्रेसको विधानमा आधारित हुने भएकाले आयोगले ती सबैको अध्ययन गरिरहेको छ। आयोगका सहसचिव एवं प्रवक्ता नारायणप्रसाद भट्टराईले शुक्रबारको प्रेस ब्रिफिङमा कांग्रेसभित्रको विवाद आन्तरिक विषय भए पनि आयोगले नजिकबाट अनुगमन गरिरहेको बताएका थिए।

"कांग्रेस विवाद दलभित्रको आन्तरिक विषय हो। त्यसमा आयोग हस्तक्षेप गर्दैन। तथापि, हामी नजिकबाट हेरिरहेका छौं," उनले भने। कांग्रेसभित्र नियमित र विशेष महाधिवेशनको विवाद कायमै रहेको छ। यस्तोमा आयोगले सम्भावित जटिलताको पूर्वअध्ययन थालेको हो।

प्रकाशित मिति: आइतबार, पुस २७, २०८२ १२:२२