लोकमान्य गोल्छा पोल्याण्डको ‘अर्डर अफ मेरिट’ पदकबाट विभूषित

उद्योग

गृहपृष्ठ
उद्योग

लोकमान्य गोल्छा पोल्याण्डको ‘अर्डर अफ मेरिट’ पदकबाट विभूषित

क्यापिटल नेपाल बिहीबार, माघ १५, २०८२

काठमाडाैं। नेपालका प्रतिष्ठित व्यवसायी तथा पोल्याण्ड गणतन्त्रका मानार्थ वाणिज्यदूत जनरल लोकमान्य गोल्छा पोल्याण्ड सरकारले प्रदान गर्ने ‘अर्डर अफ मेरिट’ पदकबाट विभूषित भएका छन्। काठमाडौंको हायात सेन्ट्रिकमा आयोजित एक विशेष समारोहका बीच भारतका लागि पोल्याण्डका कार्यवाहक राजदूत डा. पियोटर आन्तोनी श्विताल्स्कीले गोल्छालाई उक्त सम्मान प्रदान गरेका हुन्।

मानार्थ वाणिज्यदूत गोल्छाले विशेषगरी कोभिड–१९ महामारीको समयमा देखाएको उत्कृष्ट नेतृत्व र नेपालमा रहेका पोलिश नागरिकलाई वर्षौंदेखि पुर्‍याउँदै आएको निरन्तर सेवाको उच्च मूल्यांकन गर्दै साे पदक प्रदान गरिएको हो। यसअघि सन् २०१५ को विनाशकारी भूकम्पका बेला उद्धार र राहतमा पुर्‍याएको योगदानको कदर गर्दै पोल्याण्डका राष्ट्रपति आन्द्रेज दुदाले उनलाई ‘नाइट्स क्रस अफ द अर्डर अफ मेरिट’ बाट समेत सम्मानित गरिसकेका थिए।

समारोहमा महामहिम डा. श्विताल्स्कीले गोल्छाको दीर्घकालीन प्रतिबद्धताले नेपाल र पोल्याण्डबीचको जनस्तरको सम्बन्धलाई थप गहिरो बनाएको बताए। नेपालमा पोल्याण्डको स्थायी दूतावास नभएको अवस्थामा नयाँ दिल्लीस्थित दूतावाससँगको समन्वयमा गोल्छाले खेलेको कूटनीतिक र मानवीय भूमिकाको प्रशंसा गरिएको थियो।

सम्मान ग्रहण गर्दै गोल्छाले सो पदकलाई दुई देशबीचको साझा मूल्य, आपसी सम्मान र मित्रताको प्रतीकका रूपमा लिएको उल्लेख गरे।

प्रकाशित मिति: बिहीबार, माघ १५, २०८२ १६:५१