वायुसेवा निगमको महाप्रबन्धक छनोट प्रक्रिया रोक्न सर्वोच्चको अन्तरिम आदेश

पर्यटन

गृहपृष्ठ
पर्यटन

वायुसेवा निगमको महाप्रबन्धक छनोट प्रक्रिया रोक्न सर्वोच्चको अन्तरिम आदेश

क्यापिटल नेपाल बिहीबार, माघ १५, २०८२

काठमाडौं। सर्वोच्च अदालतले नेपाल वायुसेवा निगमको महाप्रबन्धक छनोट प्रक्रिया तत्काल अघि नबढाउन अन्तरिम आदेश जारी गरेको छ। निर्वाचन आचारसंहिता लागू भइसकेको अवस्थामा नियुक्ति प्रक्रिया अघि बढाउनु नियमविपरित हुने दाबी गर्दै चीरञ्जीवी उपाध्यायले दायर गरेको रिटमाथि सुनुवाइ गर्दै न्यायाधीश विनोद शर्माको एकल इजलासले यस्तो आदेश दिएको हो।

अदालतले यस विषयमा संस्कृति, पर्यटन तथा नागरिक उड्डयन मन्त्रालयलाई कारण देखाऊ आदेश समेत जारी गरेको छ। मन्त्रालयका सचिवको संयोजकत्वमा गठित छनोट समितिले गत माघ ४ गते १० जना उम्मेदवारको ‘सर्टलिस्ट’ सार्वजनिक गरी बुधबार र बिहीबार अन्तर्वार्ता तथा प्रस्तुतीकरण समेत लिइसकेको थियो। कार्यविधिअनुसार समितिले तीमध्ये तीन जनाको नाम मन्त्रिपरिषद्मा सिफारिस गर्ने तयारी गरेको थियो।

नेपाल वायुसेवा निगम ऐन २०२९ को दफा ८ (क) अनुसार महाप्रबन्धक बाहेक निगमको कुनै पनि बहालवाला कर्मचारी वा सल्लाहकार महाप्रबन्धक पदका लागि योग्य मानिँदैनन्। तर, छनोट समितिले ऐनको यो व्यवस्थालाई बेवास्ता गर्दै निगमका बहालवाला कर्मचारीहरू दिपु ज्वार्चन र टंकनिधि दाहाललाई समेत सर्टलिस्टमा समावेश गरेको थियो।

तत्कालीन कार्यकारी अध्यक्ष युवराज अधिकारीको कार्यकाल सकिएपछि निगम हाल नेतृत्वविहीन अवस्थामा छ। अदालतको यो आदेशसँगै अब नयाँ महाप्रबन्धक नियुक्तिको प्रक्रिया अन्योलमा परेको छ।

प्रकाशित मिति: बिहीबार, माघ १५, २०८२ १९:२२