तनहुँ। नेपालको सार्वजनिक नीति र अर्थतन्त्रका बहसमा लामो समयदेखि परिचित नाम हो, डा स्वर्णिम वाग्ले। अर्थशास्त्री, नीतिगत विज्ञ र योजनाविद्का रूपमा पहिचान बनाएका डा वाग्ले पछिल्ला वर्षमा सक्रिय राजनीतिमा प्रवेश गर्दै अहिले तनहुँ क्षेत्र १ बाट दोस्रो कार्यकालका लागि निर्वाचित भएका छन्।
डा वाग्ले ३८ हजार ४० मतसहित विजयी भएका हुन्। गत उपनिर्वाचनमा उनी यही क्षेत्रबाट ३४ हजार ९११ मतसहित विजयी भएका थिए। गोरखामा जन्मिएका वाग्ले सामान्य परिवेशमा हुर्किएका हुन्। बाल्यकालदेखि नै अध्ययनमा रुचि राख्ने उनी उच्च शिक्षाका लागि विदेश पुगे। अर्थशास्त्रमा गहिरो अध्ययन गर्दै उनले ‘पीएचडी’ पूरा गरे।
अध्ययनका क्रममा उनले विकास अर्थशास्त्र, सार्वजनिक नीति र आर्थिक सुधारका विषयमा विशेष अनुसन्धान गरेका थिए। यही अध्ययनले उनलाई अन्तरराष्ट्रिय स्तरका नीति बहसमा सहभागी गरायो। उच्च शिक्षापछि डा वाग्लेले विभिन्न अन्तरराष्ट्रिय संस्थामा काम गरे। विशेषगरी संयुक्त राष्ट्रसंघसँग आबद्ध कार्यक्रममा उहाँले विकास, गरिबी न्यूनीकरण र आर्थिक नीतिका विषयमा काम गरे।
स्वदेश फर्किएपछि उनले राष्ट्रिय योजना आयोगको उपाध्यक्षको जिम्मेवारी सम्हाले। त्यहाँ रहँदा देशको दीर्घकालीन विकास योजना, आर्थिक नीति सुधार र सुशासनका विषयमा महत्त्वपूर्ण योगदान दिएका थिए।
लामो समय नीतिगत क्षेत्रमा काम गरेपछि डा वाग्लेले नीति मात्र बनाउने होइन, त्यसलाई कार्यान्वयन गर्ने राजनीतिक नेतृत्व पनि आवश्यक रहेको महसुस गरे। यही सोचका साथ उनी रास्वपामार्फत राजनीतिमा प्रवेश गरेका थिए। उनको राजनीतिमा प्रवेशलाई धेरैले ‘प्राविधिक नेतृत्वबाट राजनीतिक नेतृत्वतर्फको यात्रा’ का रूपमा हेरेका छन्।
तनहुँ क्षेत्र १ बाट निर्वाचन लड्दा उहाँले विकास, सुशासन, रोजगारी र आर्थिक सुधारका विषयलाई मुख्य ‘एजेन्डा’ बताए। मतदातासँग प्रत्यक्ष संवाद गर्दै उनले नयाँ सोच र परिणाममुखी राजनीतिका कुरा राखे।
डा वाग्ले नेपाली राजनीतिमा ‘नीतिगत क्षमता भएको नेतृत्व’ का रूपमा चिनिन्छन्। अर्थतन्त्र र विकास नीतिमा उहाँको अनुभवले संसद्मा फरक आवाज थप्ने अपेक्षा गरिएको छ।–रासस
