फोहोर प्रशोधन केन्द्र बनाउन भरतपुरले छुट्यायो तीन करोड

पूर्वाधार

गृहपृष्ठ
पूर्वाधार

फोहोर प्रशोधन केन्द्र बनाउन भरतपुरले छुट्यायो तीन करोड

क्यापिटल नेपाल मंगलबार, चैत ३, २०८२

चितवन। भरतपुर महानगरको फोहोर प्रशोधन केन्द्र निर्माणका लागि वन मन्त्रालयसँग जग्गा लिने प्रक्रिया अन्तिम चरणमा पुगेको छ। जग्गाको भोगाधिकार र वृक्षरोपणका लागि मन्त्रालयलाई भुक्तान गर्नुपर्ने रकम महानगरले विनियोजन गरेको छ।

महानगरका कार्यवाहक प्रमुख चित्रसेन अधिकारीका अनुसार भरतपुर महानगर ११ मा रहेको राष्ट्रिय वन क्षेत्रमा करिब १६ बिगाह जग्गा भोगाधिकारका लागि आवश्यक तीन करोड बजेट कार्य पालिकाले सुनिश्चित गरेको छ।

महानगरले यसअघि पाँच करोड १९ लाख ७५ हजार भुक्तान गरिसकेको छ। मन्त्रालयले वातावरणीय प्रभाव मूल्यांकन तयार भई स्वीकृत भएपछि रकम भुक्तान गर्न भनेको अधिकारीले जानकारी दिए।

उनका अनुसार वातावरण प्रभाव मूल्यांकनका लागि आवश्यक तथ्यांक र कागजात उपलब्ध गराई सकिएको छ। मन्त्रालयले वातावरण प्रभाव मूल्यांकन स्वीकृत भएपछि रूख कटान थाल्ने आश्वासन दिएको छ।

जग्गा भोगाधिकार र एक बिरुवा कटान गरेबापत १० बिरुवा रोपेर पाँच वर्षसम्म संरक्षणका लागि महानगरले यसअघि नै पाँच करोड १९ लाख ७५ हजार भुक्तान गरेको महानगरको वातावरण महाशाखा प्रमुख विराट घिमिरेले बताए। अब रोपिने विरुवा संरक्षणका लागि एक करोड ९० लाख विनियोजन गरिएको हो।

हाल महानगरमा दैनिक ८० टनभन्दा बढी फोहोर संकलन हुने गरेको छ। जसलाई आँपटारीको नजिकै खोल्सामा व्यवस्थापन हुँदै आएको छ।

प्रकाशित मिति: मंगलबार, चैत ३, २०८२ १४:२६

प्रतिक्रिया दिनुहोस्