साताको दुईदिने बिदाले पनि घटाएन इन्धन खपत, फागुनमा भन्दा चैतमा बढ्यो डिजेल आयात

उद्योग

गृहपृष्ठ
उद्योग

साताको दुईदिने बिदाले पनि घटाएन इन्धन खपत, फागुनमा भन्दा चैतमा बढ्यो डिजेल आयात

क्यापिटल नेपाल मंगलबार, वैशाख ८, २०८३

काठमाडौं। सरकारले इन्धन खपत घटाउने नाममा शनिबार र आइतबार बिदा घोषणा गरे पनि खासै प्रभावकारी नदेखिएको भन्सार तथ्यांकले देखाएको छ।

दुईदिने सार्वजनिक बिदाले सार्वजनिक यातायात र निजी सवारी प्रयोगमा केही कमी ल्याउने अपेक्षा गरिए पनि निर्माण कार्य र औद्योगिक गतिविधिमा डिजेल माग बढ्दा समग्र खपत नघटेको देखिएको हो। भन्सार विभागको तथ्यांकअनुसार डिजेल खपत फागुनमा भन्दा चैतमा झनै बढेपछि यस्तो देखिएको हो।

विभागको तथ्यांकअनुसार चालू आवको चैतसम्म डिजेलको कुल आयात परिमाण १० लाख ३५ हजार ३३ किलोलिटर पुगेको छ। ज्बकि फागुनसम्म ८ लाख ९६ हजार ४४८ किलोलिटर आयात भएको थियो।

चैतमा मात्रै १ लाख ३८ हजार ५८५ किलोलिटर खपत भएको छ। फागुनसम्म डिजेलको औसत मासिक खपत १ लाख १२ हजार ५६ थियो। फागुनसम्म कुल डिजेल खपतमा १० अर्ब २१ करोड रुपैयाँ खर्च हुने गरेकामा अहिले २१ अर्ब २० करोड पुगेको छ।

पेट्रोल माग सामान्य घटेको तथ्यांकले देखाएको छ। फागुनसम्म पेट्रोल खपतको औसत वृद्धिदर करिब ६३ हजार ९८८ किलोलिटर रहेकामा चैतमा ५६ हजार ४५९ किलोलिटरमा सीमित भएको छ।

मूल्यवृद्धिका कारण यसअघि मासिक औसत ५ अर्ब ४८ करोड खर्च हुँदै आएको पेट्रोलमा चैतमा मात्रै ६ अर्ब ४९ करोड रुपैयाँ खर्च भएको छ। डिजेल व्यावसायिक प्रयोजनमा खपत हुने भएकाले माग घट्ने गर्दैन।

सरकारले चैतमा डिजेल आयातबाट मात्रै ४ करोड २५ लाख १९ हजार २३१ र पेट्रोलबाट ३ करोड २३ लाख १० हजार ५९६ रुपैयाँ राजस्व संकलन गरेको छ। आयल निमगले डिजेलमा ९९ रुपैयाँ १६ पैसा नोक्सानी बेहोर्दै आएको बताएको छ भने पेट्रोलमा खासै नोक्सानी छैन।

प्रकाशित मिति: मंगलबार, वैशाख ८, २०८३ ११:३३

प्रतिक्रिया दिनुहोस्