बल्खु र वंशीघाटबाट हटाइएका ५० सुकुमबासीले रंगशाला पुगेर टिपाए विवरण

राजनीति

गृहपृष्ठ
राजनीति

बल्खु र वंशीघाटबाट हटाइएका ५० सुकुमबासीले रंगशाला पुगेर टिपाए विवरण

क्यापिटल नेपाल शुक्रबार, वैशाख १८, २०८३

काठमाडौं। काठमाडौँको बल्खु र वंशीघाटस्थित सुकुमबासी बस्तीबाट हटाइएकामध्ये शुक्रबार दिउँसोसम्म ५० घरपरिवारले दशरथ रंगशालामा पुगेर नाम टिपाएका छन्। घर, जग्गा, पैतृक सम्पत्ति नभएको र न्यून आयस्रोत भएको उल्लेख गर्दै उनीहरुले विवरण टिपाएका हुन्।

दशरथ रंगशालामा शहरी विकास तथा भवन निर्माण विभाग, काठामाडौँ उपत्यका विकास प्राधिकरण, अधिकार सम्पन्न बागमती सभ्यता एकीकृत विकास समिति र काठमाडौँ महानगर प्रहरीको संयुक्त टोलीले उनीहरुको विवरण संकलन गरिरहेको छ।

विवरण संकलनपछि स्वास्थ्य जाँच तथा मनोपरामर्श गरेर उनीहरुलाई तोकिएका ‘होल्डिङ सेन्टर’मा लैजाने तयारी भइरहेको जनाइएको छ। उनीहरुलाई तत्कालका लागि ललितपुरको धापाखेलस्थित टेवा कार्यालय तथा निवास, भक्तपुरको खरिपाटीको विद्युत् तालिम केन्द्र, बोडेस्थित कृषि विकास बैंक तालिम केन्द्र, नगरकोट खानेपानी तालिम केन्द्र, काठमाडौँको चोभारस्थित तरकारी बजार व्यवस्थापन केन्द्र र काभ्रे होल्डिङ सेन्टरमा लैजाने तयारी भइरहेको छ।

अधिकारसम्पन्न बाग्मती सभ्यता एकीकृत समितिका आयोजना निर्देशक मचाकाजी महर्जनले भने, ‘दशरथ रंगशालामा आइपुगेका सुकुम्बासीको विवरण संकलन गरी होल्डिङ सेन्टरमा पठाउने तयारी भइरहेको छ।’

प्रकाशित मिति: शुक्रबार, वैशाख १८, २०८३ १४:०३

प्रतिक्रिया दिनुहोस्