काठमाडौं। जल तथा मौसम विज्ञान विभागका अनुसार आज पनि काठमाडौँलगायत विभिन्न जिल्लामा भारीदेखि धेरै भारीसम्म वर्षा भएको छ।
राती १२ः०० बजेको अभिलेखअनुसार पछिल्लो १२ घन्टामा सिन्धुपाल्चोकको गोब्रेमा १३६ मिलिमिटर वर्षा भएको छ, जुन सर्वाधिक हो। काठमाडौँमै अपराह्न ५१ मिलिमिटर वर्षा हुँदा माइतीघरलगायतका क्षेत्र जलमग्न भए।
यस्तै नवलपरासीपूर्वमा ९४ मिलीमिटर, कास्कीमा ७६, रुकुमपूर्वमा ५६, लमजुङमा ७६ र चिवतनमा ५६ मिलीमिटर वर्षा भएको छ। अन्य धेरै जिल्लामा मध्यमदेखि भारीसम्म वर्षा भएको विभागका सूचना अधिकारी दिनकर कार्यस्थले जानकारी दिए।
विभागले जारी गरेको बुलेटिनअनुसार हाल देशभर मनसुनी वायुको प्रभाव रहेको छ। हाल मनसुनको न्यूनचापीय रेखा पश्चिममा सरदर स्थानभन्दा केहीमाथि नेपालको तराई भूभाग आसपास र पूर्वमा सरदर स्थान आसपास रहेको छ। बिहीबार राती बागमती, गण्डकी र लुम्बिनी प्रदेशका पहाडी र तराईका एकदुई स्थानमा भारी वर्षा भएको छ।
त्यसैगरी आज देशका पहाडी भूभाग, कोशी, बागमती, गण्डकी र कर्णाली प्रदेशका हिमाली भूभाग तथा लुम्बिनी प्रदेशको तराई भूभागका एकदुई स्थानमा भारी वर्षाको सम्भावना रहेको जनाइएको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले एक सूचनामार्फत् सिन्धुपाल्चोकको मेलम्ची र इन्द्रावती जलाधारमा ठूलो पानी परेको र राति थप पानी पर्ने सम्भावना भएकाले बाढीपहिरोको जोखिम रहेको जनाएको छ। आवश्यक सतर्कता अपनाउनसमेत प्राधिकरणले आग्रह गरेको छ।
-1754887381.jpg)
-1784203648-1784248554.jpg)
