सुनको मूल्यमा ऐतिहासिक रेकर्ड, तोलाको ७३ हजार ५००

अर्थतन्त्र

गृहपृष्ठ
अर्थतन्त्र

सुनको मूल्यमा ऐतिहासिक रेकर्ड, तोलाको ७३ हजार ५००

क्यापिटल नेपालसोमबार, भदौ ९, २०७६

काठमाडौं । डेढ महिनादेखि निरन्तर उकालो लाग्दै आएको सुनको मूल्य सोमबार बढेर अहिलेसम्मकै उच्च बिन्दुमा पुगेको छ । नेपाल सुन चाँदी व्यवसायी महासङ्घका अनुसार छापावाला सुनको मूल्य प्रतितोला एक हजार रुपैयाँले वृद्धि भएको छ ।

छापावाला सुनको मूल्य प्रतितोला ७३ हजार ५०० रुपैयाँ कायम भएको छ । आइतबार सुनको मूल्य ७२ हजार ५०० रुपैयाँ थियो । शुक्रबार छापावाला सुन प्रतितोला ७३ हजार ३०० रुपैयाँमा कारोबार भएको थियो ।

यस्तै तेजाबी सुनको मूल्य पनि प्रतितोला एक हजार रुपैयाँ वृद्धि भएको छ । स्थानीय बजारमा तेजाबी सुनको मूल्य प्रतितोला ७३ हजार ३०० रुपैयाँ पुगेको छ । आइतबार तेजाबी सुन प्रतितोला ७२ हजार २०० रुपैयाँमा कारोवार भएको थियो ।

सुनसँगै चाँदीको मूल्यमा पनि उच्च वृद्धि देखिएको छ । यसअघि प्रतितोला ५ देखि १० रुपैयाँका दरले वृद्धि हुँदै आएको चाँदीको मूल्यमा सोमबार प्रतितोला १० रुपैयाँ वृद्धि भएको छ ।

स्थानीय बजारमा चाँदीको मूल्य प्रतितोला ८६० रुपैयाँ पुगेको महासङ्घले जनाएको छ । आइतबार चाँदी प्रतितोला ८५० रुपैयाँमा खरीदबिक्री भएको थियो ।

गत साउनको शुरुआतदेखि नै सुनको मूल्य उकालो लाग्न थालेको थियो । साउन महिनामा सुनको मूल्य प्रतितोला सात हजार रुपैयाँ र चाँदीको मूल्य प्रतितोला ९५ रुपैयाँले वृद्धि भएको थियो ।

भदौ महिना लागेपछि पनि दुई पटक सुनको मूल्य वृद्धि भएको छ । भदौमा छापावला र तेजाबी सुन प्रतितोला दुई हजार ५०० रुपैयाँले वृद्धि भएको छ । अमेरिका र चीनबीचको व्यापार युद्धले सुन बजारलाई तताएको छ ।

प्रकाशित मिति: सोमबार, भदौ ९, २०७६ ११:५०

प्रतिक्रिया दिनुहोस्