बैङ्कहरुले ग्राहकलाई रेस्पोन्स गरेनन, राष्ट्र बैङ्कमा एटीएमबाट पैसा झिक्न नपाएको गुनासोका चाङ

बैंकिङ

गृहपृष्ठ
बैंकिङ

बैङ्कहरुले ग्राहकलाई रेस्पोन्स गरेनन, राष्ट्र बैङ्कमा एटीएमबाट पैसा झिक्न नपाएको गुनासोका चाङ

क्यापिटल नेपाल शनिबार, भदौ २८, २०७६

काठमाडौ । चिनियाँहरुले एटीएम ह्याक गरेर करोडौ रुपैयाँ चोरेपछि बैङ्कहरुको एटीएम नचल्दा ग्राहको गुनासो बढेको छ । एटीएम नचलेर पैसा झिक्न नपाएपछि ग्राहकहरुले नेपाल राष्ट्र बैङ्कमा गुनासो गर्न थालेका छन ।

नेपालका अतिरित्त भारतबाट पनि गुनासो आएको राष्ट्र बैङ्कका प्रवत्ता लक्ष्मीप्रपन्न निरौलाले बताए । एटीएममा समस्या आएको जानकारी गराउँदा पनि सम्बन्धित बैङ्कले चासो नदेखाएको गुनासो आएको प्रवक्ता निरौलाले बताए ।

उनले एटीएम नचलेमा सम्बन्धित बैंकका प्रमुख कार्यकारी अधिकृत (सीईओ) र सहायक प्रमुख कार्यकारी अधिकृतलाई फोन गर्न भनेपनि उनीहरुबाट गुनासो सम्बोधन नभएको निरौलाको भनाई छ ।

गत भदौ १४ गते नेपाल पेमेन्ट सिस्टम (नेप्स)को सिस्टम ह्याक गरी ह्याकरहरुले ठुलो रकम चोरी गरेपछि उसमा आवद्द बैङकहरुको एटीएममा लगातार समस्या देखिएको छ ।

बाहिरका एटीएममा धेरै समस्या देखिएको राष्ट्र बैङ्कले जनाएको छ । जुनसुकै स्थानमा भएका बैङ्कका एटिएममा समस्या आए पनि सिधै सीईओ र सहायक सीइओहरुलाई सम्पर्क गर्न राष्ट्र बैंकले आग्रह गरेको थियो ।

नेपाल बैंकर्स संघका अध्यक्ष ज्ञानेन्द्र ढुंगानाले समस्या समाधानका लागि बैङ्कहरुले व्यवस्था गरिसकेको बताए । बैङ्कका सीइओ तथा डेपुटी सीईओहरुलाई सिधै र इमेलबाट पनि सम्पर्क गर्न सकिने गरी व्यवस्था गरेको अध्यक्ष ढुंगानाले बताए । भोली आइतबारसम्म सबै एटीएमहरु चल्ने उनले जानकारी दिए ।