राहदानीबाट तनहुँमा ४ करोड ४२ लाख राजस्व संकलन

मुख्य समाचार

गृहपृष्ठ
मुख्य समाचार

राहदानीबाट तनहुँमा ४ करोड ४२ लाख राजस्व संकलन

क्यापिटल नेपाल आइतबार, भदौ २६, २०७९

दमाैली । तनहुँमा राहदानी वितरणबाट गत आर्थिक वर्ष २०७८/७९ मा ४ करोड ४२ लाख राजस्व संकलन भएको छ । सो आवमा जिल्लाबाट छ हजार छ सय १९ राहदानी वितरण गरिएको सहायक प्रमुख जिल्ला अधिकारी काशीराम गैह्रेले जानकारी दिए । त्यस्तै ८ हजार ८ सय ५४ जनाको राहदानीका लागि जिल्लाबाट सिफारिस गरिएको छ भने आठ सय ७२ द्रुत सेवाका लागि सिफारिस गरिएको छ ।

कार्यालयले एक वर्षको अवधिमा विभिन्न शीर्षकबाट ४ करोड ८० लाख राजस्व संकलन गरेको छ । संस्था दर्ता, हातहतियार, राहदानी दस्तुर, न्यायिक दण्ड जरिवाना, प्रशासनिक दण्ड, जरिवाना र जफत, बेरुजु र परीक्षा शुल्कबाट उक्त राजस्व संकलन गरेको हो ।

सो अवधिमा ५२ मुद्दा दर्ता भएको छ । २ हजार ४ सय ७० जनालाई आदिवासी जनजाति प्रमाणित, एक हजार ८० जनालाई दलित प्रमाणित, एक हजार आठ सय ७८ लाई पेन्सन सिफारिस गरिएको छ ।

कार्यालयमा ८४ संस्था नयाँ दर्ता भएकामा सात सय ८५ संस्थाको नवीकरण भएको छ । ९९ हातहतियार नवीकरण भएकामा छवटा नामसारी गरिएको छ । यस अवधिमा एक पत्रपत्रिका दर्ता भएको कार्यालयले जनाएको छ ।

प्रकाशित मिति: आइतबार, भदौ २६, २०७९ ११:००

प्रतिक्रिया दिनुहोस्