एक महिनामा चट्याङबाट पाँचको मृत्यु, ४३ जना घाइते

समाज

गृहपृष्ठ
समाज

एक महिनामा चट्याङबाट पाँचको मृत्यु, ४३ जना घाइते

क्यापिटल नेपालमंगलबार, जेठ २, २०८०

काठमाडौं। पछिल्लो एक महिनामा देशका विभिन्न स्थानमा चट्याङका थुप्रै घटना घटेका छन्। राष्ट्रिय विपद् जोखिम न्यूनीकरण व्यवस्थापन प्राधिकरणकाअनुसार गएको एक महिनाको अवधिमा चट्याङ लागेर पाँच जनाको मृत्यु भएको छ भने ४३ घाइते भएका छन्।

प्राधिकरणकाअनुसार गत वैशाख १ देखि जेठ १ सम्ममा चट्याङका ४४ वटा घटना भएका छन्। गए राति चट्याङ लागेर दैलेखमा एकै घरका चारजना घाइते भएकाे प्राधिकरणले जनाएकाे छ।

डुङेश्वर गाउँपालिका-२ लाँकुरीका २१ वर्षीय पारस विक, १६ वर्षीया हेमा विक, १७ वर्षीया पूर्णा विक र २० वर्षीया पुष्पा विकलाई सुतिरहेकै बेला चट्याङ लागेको हो। घाइतेहरूको उपचार भइरहेको छ।

देशका पहाडी जिल्लामा हुरीबतास र मेघगर्जनसहित चट्याङ पर्नेक्रम जारी रहेकाले सावधानी अपनाउन मौसमविद् गोविन्द झाले आग्रह गरे। उनका अनुसार आज बागमती, कोशी, गण्डकी र कर्णाली प्रदेशका पहाडी क्षेत्रमा चट्याङ पर्ने सम्भावना छ। प्री-मनसुनमा चट्याङ पर्ने धेरै सम्भावना रहेको उनको भनाइ छ।

चट्याङ पर्दा शरीरमा त्यसको विद्युत् प्रवाह भएर घाइते हुने तथा ज्यान नै जाने खतरा हुने राष्ट्रिय विपद् जोखिम न्यूनीकरण व्यवस्थापन प्राधिकरणका प्रमुख कार्यकारी अधिकृत अनिल पोखरेलले जानकारी दिए। चट्याङ पर्ने समयमा खेतबारीको काममा नजान र गड्याङगुडुङको आवाज सुनेपछि घरभित्र वा सुरक्षित ठाउँमा बस्न उहाँको सुझाव छ।

अझै तीन–चार महिना चट्याङ पर्ने सम्भावना उच्च हुने भएकाले सावधानी अपनाउन प्राधिकरणले आग्रह गरेको छ।

प्रकाशित मिति: मंगलबार, जेठ २, २०८० १४:१६

प्रतिक्रिया दिनुहोस्