भन्सारबाट सामान छुटिसकेपछि पनि चार वर्षसम्म व्यवसायीको कारोबार स्थलमै भन्सार परीक्षण हुने

अर्थतन्त्र

गृहपृष्ठ
अर्थतन्त्र

भन्सारबाट सामान छुटिसकेपछि पनि चार वर्षसम्म व्यवसायीको कारोबार स्थलमै भन्सार परीक्षण हुने

क्यापिटल नेपाल मंगलबार, वैशाख २२, २०८३

काठमाडौं। सरकारले सामान जाँचपास भएर भन्सार विन्दुबाट बाहिरिएपछि पनि भन्सार विभागले व्यवसायीको गोदाम वा कार्यालयमै पुगेर पुराना कारोबारको विस्तृत लेखापरीक्षण गर्न पाउने कानुनी व्यवस्था कार्यान्वयनमा ल्याएको छ। भन्सार नियमावली २०८३ ले ‘जाँचपास पछिको परीक्षण’ सम्बन्धी प्रावधानलाई थप शक्तिशाली र व्यवस्थित बनाएको छ।

नियमावलीको नियम ९९ अनुसार निकासी वा पैठारीकर्ताले आफूले गरेको कारोबारसँग सम्बन्धित प्रज्ञापनपत्र, महसुल तिरेको रसिद, खरिद खाता, बिक्री बीजक, बैंकिङ कागजात र मौज्दात विवरण जस्ता प्रमाणहरू सामान जाँचपास भएको मितिले कम्तीमा चार वर्षसम्म अनिवार्य रूपमा सुरक्षित राख्नुपर्नेछ। विभागबाट खटिएका भन्सार परीक्षक वा अधिकृतहरूले कुनै पनि बेला व्यवसायीको कार्यस्थलमा प्रवेश गरी ती कागजातहरू नियन्त्रणमा लिन, निरीक्षण गर्न र विवरण नमिलेमा थप महसुल तथा जरिवाना असुल गर्न सक्नेछन्।

यसअघिको व्यवस्थामा मुख्य गरी भन्सार विन्दुमा सामान आइपुगेकै समयमा मात्रै सघन जाँच र मूल्याङ्कन गर्ने पद्धतिमा बढी जोड दिइन्थ्यो। सामान भन्सारबाट एक पटक पास भएर निस्किसकेपछि विशेष उजुरी वा ठुलै शङ्कास्पद अवस्थामा बाहेक व्यवसायीको आन्तरिक लेखामाथि नियमित रूपमा चार वर्षसम्म परीक्षण गर्ने पद्धति यति व्यवस्थित र अनिवार्य थिएन। पहिलेको प्रणालीले गर्दा सीमामा सामान धेरै बेर रोकिने र कर्मचारीको तजबिजी अधिकार बढी हुने जोखिम थियो। अहिले भने सामान सुरुमा छिटो छोड्ने र पछि व्यवसायीको कार्यालयमै गएर कागजात जाँच्ने आधुनिक अन्तर्राष्ट्रिय पद्धतिलाई पूर्ण रूपमा अंगीकार गरिएको छ।

प्रकाशित मिति: मंगलबार, वैशाख २२, २०८३ २०:०९

प्रतिक्रिया दिनुहोस्