भन्सार चोरी पैठारी रोक्न सूचना दिने सुराकीलाई बिगोको १५ देखि ३० प्रतिशत पुरस्कार

अर्थतन्त्र

गृहपृष्ठ
अर्थतन्त्र

भन्सार चोरी पैठारी रोक्न सूचना दिने सुराकीलाई बिगोको १५ देखि ३० प्रतिशत पुरस्कार

क्यापिटल नेपाल मंगलबार, वैशाख २२, २०८३

काठमाडौं। भन्सार विभागले 'भन्सार नियमावली २०८३' जारी गर्दै चोरी निकासी र पैठारी नियन्त्रणमा सहयोग गर्ने सुराकीलाई मोटो रकम पुरस्कार दिने र जफत भएका सामान लिलामीलाई पारदर्शी बनाउने नयाँ व्यवस्था गरेको छ।

नियमावलीको परिच्छेद २१ अनुसार भन्सार चोरी पैठारी वा निकासी हुन लागेको सूचना दिने व्यक्तिलाई विभागले आकर्षक पुरस्कारको व्यवस्था गरेको हो। नियमावलीको नियम ११३ अनुसार चोरी निकासी वा पैठारी हुन लागेको वस्तु पक्राउ गर्न सहयोग गर्ने वा सुराकी दिनेलाई बरामद वस्तुको मूल्याङ्कन (बिगो) को १५ प्रतिशतदेखि ३० प्रतिशतसम्म पुरस्कार दिइनेछ।

विशेषगरी चोरीको सामान मात्र पक्राउ गराउने सुराकीलाई १५ प्रतिशत, सामानसहित मानिस पक्राउ गराउनेलाई २० प्रतिशत र सुराकीसहित आफैँले तस्करीको सामान पक्राउ गरी बुझाउनेलाई ३० प्रतिशतसम्म पुरस्कार दिने आधार तय गरिएको छ। साथै, जफत गरिएका वा लामो समयदेखि भन्सारमा थुप्रिएका बेवारिसे सामानहरूलाई पारदर्शी बनाउन राष्ट्रिय स्तरको पत्रिकामा सूचना निकालेर बोलपत्र वा लिलाम बढाबढ प्रक्रियाबाट मात्र बिक्री गरिने नियम ल्याइएको छ।

विगतमा सुराकीलाई पुरस्कार दिने र सामान लिलामी गर्ने प्रक्रियामा धेरै प्रक्रियागत झन्झट र अस्पष्टताहरू थिए। पहिलेको व्यवस्थामा मूल्याङ्कन र पुरस्कार वितरणमा कर्मचारीको तजबिजी अधिकार बढी हुँदा पारदर्शिताको अभाव देखिन्थ्यो भने लिलामी प्रक्रिया पनि सुस्त थियो। अहिले नयाँ नियमावलीले पुरस्कारको सीमा र लिलामीको विधि दुवैलाई कानुनी रूपमै सुदृढ र पारदर्शी बनाएको छ।

प्रकाशित मिति: मंगलबार, वैशाख २२, २०८३ २०:०४

प्रतिक्रिया दिनुहोस्