नबिल र एसियन पेन्ट्सबीच ‘च्यानल फाइनान्सिङ’ को सम्झौता

कर्पोरेट बजार

गृहपृष्ठ
कर्पोरेट बजार

नबिल र एसियन पेन्ट्सबीच ‘च्यानल फाइनान्सिङ’ को सम्झौता

क्यापिटल नेपालमंगलबार, जेठ ३०, २०८०

काठमाडौं। नबिल बैंक लिमिटेड र एसियन पेन्ट्स नेपाल प्रालिबीच च्यानल फाइनान्सिङ सुविधाको सम्झौता भएको छ।

च्यानल फाइनान्सिङ सहकार्य सम्बन्धमा सोमबार नबिल बैंकका तर्फबाट प्रमुख कार्यकारी अधिकृत (सिइओ) ज्ञानेन्द्रप्रसाद ढुंगाना र एसियन पेन्ट्सका तर्फबाट कन्ट्री डाइरेक्टर गोपालकृष्णनले सम्झौता पत्रमा हस्ताक्षर गरेका हुन्।

कार्यक्रममा नबिलका वरिष्ठ डेपुटी सिइओ सुजितकुमार शाक्य, डेपुटी सिइओ विनय रेग्मी, डेपुटी सिइओ भुपेन्द्र पाण्डे र एसएमई लघुवित्त तथा दिगो बैंकिङका प्रमुख निरज बस्नेत डनिल, एसियन पेन्ट्सका प्रमुख वित्त अधिकृत समीर श्रेष्ठलगायत कार्यकारी उपस्थित थिए।

सम्झौताअनुसार एसियन पेन्ट्स नेपालसँग आबद्ध व्यवसायीहरूले च्यानल फाइनान्सिङको रूपमा थप व्यवसाय विस्तार गर्न चालू पुँजीमा लगानी गर्ने उद्देश्यका लागि आकर्षक ब्याजदर र न्यून धितो अनुपातमा नबिल बैंकका देशैभरि फैलिएका शाखा सञ्जालहरूबाट च्यानल फाइनान्सिङ कर्जा उपभोग गर्न पाउने छन्।

च्यानल फाइनान्सिङका प्रमुख आकर्षणअन्तर्गत आफ्ना वितरकहरूलाई सामान बिक्री गरेको बिलबराबरको पूरा रकम भुक्तानी हुने कर्जा सुविधा उपलब्ध हुने बताइएको छ। बैंकले सम्बन्धित व्यवसायीहरूको लागि व्यवसाय विस्तार गर्न अन्य सेवा तथा एसएमई कर्जासमेत सहुलियत दरमा उपलब्ध हुने जनाएको छ।
बैंकसँग आबद्ध हुने एसियन पेन्ट्सका वितरकहरूले बैंकबाट विशिष्टीकृत सेवा पाउने नबिल बैंकका प्रमुख कार्यकारी अधिकृत ढुंगानाले बताए।

यो सुविधाले नेपाल राष्ट्र बैंकद्वारा जारी गरिएको चालू पुँजी कर्जासम्बन्धी मार्गदर्शन अनुरूप नै सम्पूर्ण खरिद बिक्रीको भुक्तानी प्रक्रिया बैंक खातामार्फत मात्रै हुने ढुंगानाको भनाइ छ।

प्रकाशित मिति: मंगलबार, जेठ ३०, २०८० १५:३८

प्रतिक्रिया दिनुहोस्