विदेश जान लागेका १०० भन्दा धेरै श्रमिकलाई एयरपोर्टबाटै फर्काइयो

रोजगार

गृहपृष्ठ
रोजगार

विदेश जान लागेका १०० भन्दा धेरै श्रमिकलाई एयरपोर्टबाटै फर्काइयो

क्यापिटल नेपाल बिहीबार, असार २८, २०८०

काठमाडौं। वैदेशिक रोजगारीमा जान लागेका १ सयभन्दा धेरैलाई एयरपोर्टबाटै फर्काइएको छ। त्रिभुवन अन्तराष्ट्रिय विमानस्थल अध्यामागमन कार्यालयले बुधबार बेलुका १ सय जनाभन्दा बढी नेपाली कामदारलाई वैदेशिक रोजगारमा जान नदिई फिर्ता पठाएको हो।

कागजात शंकास्पद भएको अनुमानकै भरमा उनीहरूलाई वैदेशिक रोजगारमा जान वञ्चित गरिएको पीडितले जनाएका छन्। उनीहरूसगँ भएको भिसा, टिकट प्रमाणित रहेको, विभिन्न म्यानपावरमार्फत श्रम स्वीकृति प्रमाणित नै रहेको बताइएको छ।

वैदेशिक रोजगारमा जाने प्रयोजनका लागि यिनै कागजात स्पष्ट हुनुपर्ने व्यवस्था रहेको अवस्थामा अध्यागमनले रोक्नुपर्ने कारण अध्यागमन आफ्नै गतिविधि शंकास्पद रहेको वैदेशिक रोजगार व्यवसायीले जनाएका छन्।

यस सम्बन्धमा सम्बन्धित म्यानपावर कम्पनीहरूसँग समेत भेरिफाई गर्दा कुनै कागजात फेक नरहेको र विमानस्थलले रोक्नुपर्ने कारण नरहेको वैदेशिक रोजगार व्यवसायी महासघंका अध्यक्ष राजेन्द्र भण्डारीले जानकारी दिए।

संस्थागतरूपमा रोजगारमा गएका नागरिकलाई विदेश पुगेपछि आउने समस्या समाधानको जिम्मेवारी वैदेशिक रोजगार विभागको कार्यक्षेत्रभित्र पर्ने र संस्थागत रूपमा हुने श्रम स्वीकृति सम्बन्धित देशमा रहेको दूतावासबाट प्रमाणीकरण भई विभागबाट श्रम स्वीकृति समेत लिई आउने हुँदा कामदारलाई आइपर्ने समस्याको स्पष्ट कानुनी उपचार पाउने आधार हुन्छ। साथै कामदार विदेशमा गई अलपत्र परेको खण्डमा कारवाहीको लागि म्यानपावर आफैंमा भागिदार हुने अवस्था छ। यस सम्बन्धमा महासंघले ध्यानाकर्षण गराएको छ।

विमानस्थलका कर्मचारीले भिसा र श्रम स्वीकृति लिए–नलिएको अनलाइनबाटै चेक गर्ने स्पष्ट अवस्था हुँदाहुँदै वैदेशिक रोजगारका लागि विदेशिन लागेको नेपाली नागरिकलाई रोक्नु स्वभाविक मान्न नसकिने महासंघले जनाएको छ।

प्रकाशित मिति: बिहीबार, असार २८, २०८० १२:१७

प्रतिक्रिया दिनुहोस्