गुणाकरलाई गभर्नर बनाउन बाटो खुल्यो, राजीनामा स्वीकृत नभए पनि बाधा नपर्ने

बैंकिङ

गृहपृष्ठ
बैंकिङ

गुणाकरलाई गभर्नर बनाउन बाटो खुल्यो, राजीनामा स्वीकृत नभए पनि बाधा नपर्ने

क्यापिटल नेपाल बुधबार, वैशाख १७, २०८२

काठमाडौं। नेपाल राष्ट्र बैंकका कार्यकारी निर्देशक डा.गुणाकर भट्टलाई गभर्नर बनाउन बाटो खुलेको छ। राष्ट्र बैंकको गभर्नरमा डा.भट्टको योग्यता नपुग्ने भन्दै सर्वोच्च अदालतमा परेको पूरक निवेदन इजलासले अस्वीकार गरेसँगै गभर्नर बन्ने बाटो खुलेको हो।

अभिवक्ताद्वय विशाल थापा र प्रतिभा उप्रेतिले गभर्नर बन्न भट्टको योग्यता नपुग्ने भन्दै सर्वोच्च अदालतमा पूरक निवेदन दर्ता गराएको थिए। बुधबार न्यायाधीशद्वय तिल प्रसाद श्रेष्ठ र वालकृष्ण ढकालका इजलासले उक्त पूरक निवेदन अस्वीकार गरेको हो।

यता, उनले राष्ट्र बैंकको कर्मचारी सेवा विनियमावलीको व्यवस्था पूरा गरी राजीनामा दिएपनि कायम मुकायम गभर्नर डा.निलम ढुंगाना तिम्सिनाले राजीनामा स्वीकृत गरेकी छैनन्। राजीनामा स्वीकृत नभए पनि अब अदालतको सो आदेशपछि डा.भट्टलाई गभर्नर बन्न बाधा नपर्ने बताइएको छ।

यस्तै,गभर्नर नियुक्तिमा उमेरहद नहटाउन सर्वोच्च अदालतले अन्तरिम आदेश दिएको छ। गत चैत १८ गते अर्थ मन्त्रालयले अर्थ सम्बद्ध सार्वजनिक निकायमा पदाधिकारी तथा सदस्य नियुक्ति र ‘मनोनयन सम्बन्धी मापदण्ड २०७३’ संशोधन गर्दै पदाधिकारी तथा सदस्य नियुक्तिमा रहेको उमेर हद हटाएको थियो। उक्त संशोधनविरुद्ध अधिवक्ता प्रतिभा उप्रेती र विशाल थापाले चैत ३१ गते सर्वोच्च अदालतमा रिट दायर गरेका थिए।

प्रकाशित मिति: बुधबार, वैशाख १७, २०८२ १८:००