काठमाडौं। नेपाल पर्यटन बोर्डले सन् २०२५ को अप्रिलमा हालसम्मकै उच्च संख्यामा विदेशी पर्यटक नेपाल घुमफिरमा आएको तथ्यांक सार्वजनिक गरेको छ।
बोर्डको तथ्यांकअनुसार अप्रिलमा मात्रै एक लाख १६ हजार ४९० विदेशी पर्यटक नेपाल आएका छन्।
अप्रिल महिनामा नेपालको पर्यटनले विदेशी पर्यटक आगमनमा रेकर्ड कायम भएको बोर्डले उल्लेख गरेको छ।
अप्रिलमा सबैभन्दा बढी भारतबाट २५ हजार ९३३, अमेरिकाबाट १० हजार ५३, चीनबाट ९ हजार ३७ र बेलायतबाट ६ हजार ८३८ पर्यटक नेपाल भित्रिएका छन्। पछिल्लो आँकडा हेर्दा भारतीय र चिनियाँ पर्यटक बढ्न सकेका छैनन्।
बोर्डका अनुसार सन् २०१९ को तुलनामा १०६ दशमलव ५ प्रतिशतले विदेशी पर्यटक आगमनमा बढोत्तरी भएको छ। कोरोना महामारीपूर्व सन् २०१९ को अप्रिलमा सबैभन्दा धेरै एक लाख नौ हजार ३९९ विदेशी पर्यटक नेपाल आएका थिए।
सन् २०२४ को अप्रिलमा एक लाख ११ हजार ३७६ जना विदेशी पर्यटक नेपाल आए भने सन् २०२३ को अप्रिलमा ९८ हजार ७७३ जना पर्यटक नेपाल भित्रिएका थिए। ‘आधिकारिक रुपमा १०६ दशमलव ५ प्रतिशत पूर्व–महामारी स्तरमा पुगेका छाँै, यसले बलियो ‘रिकभरी’ र नेपालमा बढ्दो विश्वव्यापी चासो देखाउँछ’, बोर्डले भनेको छ।
बोर्डका प्रमुख कार्यकारी अधिकृत दीपकराज जोशीले अप्रिलको पर्यटक आगमन उत्साहवर्द्धक रहेको बताए। ‘यो वृद्धि नेपालको स्थायी आकर्षण र पर्यटन सभ्यताको प्रमाण हो’, उनले भने।
बोर्डको विवरणमा वर्षको चार महिना (जनवरी–अप्रिल) अवधिमा चार लाख १५ हजार ४८ पर्यटक नेपाल भित्रिएका छन्। जनवरीमा ७९ हजार ९९१, फेब्रुअरीमा ९६ हजार ८८० र मार्चमा एक लाख २१ हजार आठ सय विदेशी पर्यटक नेपाल आएका थिए।
