असार सकिँदासम्म १२ पालिकाले अझै ल्याएनन् बजेट (सूचीसहित)

अर्थतन्त्र

गृहपृष्ठ
अर्थतन्त्र

असार सकिँदासम्म १२ पालिकाले अझै ल्याएनन् बजेट (सूचीसहित)

क्यापिटल नेपालबिहीबार, साउन १, २०८२

काठमाडौं। आगामी आर्थिक वर्षको बजेट कार्यान्वयन सुरु भइसक्दा पनि १२ गाउँपालिकाले हालसम्म आयव्यय सार्वजनिक नगरेको गाउँपालिका राष्ट्रिय महासंघले जनाएको छ। बजेट असारभित्र स्वीकृत गराएर साउन १ देखि कार्यान्वयनमा लैजानुपर्ने व्यवस्था छ।

सबैभन्दा बढी मधेस प्रदेशका ८ गाउँपालिकाले बजेट ल्याउन नसकेको महासंघको विवरणमा उल्लेख छ। मधेसका ५९ गाउँपालिकामध्ये ८ वटाले समयसीमाभित्र बजेट पारित गर्न असफल भएका हुन्।

बजेट पारित नगर्ने गाउँपालिकालाई प्रक्रिया पूरा गरी वित्तीय अनुशासन कायम गर्न महासंघले सूचनामार्फत जनाएको छ।

४६० पालिकामध्ये ४४८ वटा अर्थात् ९७ प्रतिशतले मात्र बजेट स्वीकृत गरेको महासंघको विज्ञप्तिमा उल्लेख छ।
बागमतीका २ तथा लुम्बिनी र सुदूरपश्चिम प्रदेशका एक–एक गाउँपालिकाले पनि बजेट ल्याएनन्।

गण्डकी, कर्णाली र कोसी प्रदेशका सबै गाउँपालिकाले समयमै बजेट स्वीकृत गरी शतप्रतिशत नतिजा प्राप्त गरेको महासंघका कार्यकारी निर्देशक राजेन्द्रप्रसाद प्याकुरेलले बताए।

संवैधानिक प्रावधानअनुसार स्थानीय तहले असार १० भित्र नगर/गाउँसभामा बजेट पेस गरी असार मसान्तभित्र पारित गरिसक्नुपर्छ। समयमै बजेट पारित नहुँदा आगामी आर्थिक वर्षका लागि विकास निर्माणका काम र अन्य प्रशासनिक खर्च सञ्चालनमा कानुनी अड्चन आउन सक्छ।

517370187_1277127284086192_686220036784850916_n_syHJp66hjc-1752723352.jpg