मोरङ। नेपाली कांग्रेसका नेता डा. शेखर कोइरालाले भ्रष्टाचारको अन्त्य र सुशासन कायम भए मुलुकमा लोकतन्त्र बलियो हुने बताएका छन्।
विराटनगर वरगाछीस्थित गुराँस पुस्तकालयद्वारा आयोजित मुक्तिप्रसाद-यदुनाथ चापागाईं सम्मान कार्यक्रममा उनले राजनीतिक दलका नेता इमान्दार भए संघीय गणतन्त्रको सफल कार्यान्वयन हुनुका साथै लोकतन्त्र बलियो हुने धारणा राखे।
प्रतिनिधिसभा सदस्य डा. कोइरालाले पार्टीको आफ्नो विचार र सिद्धान्त बिर्सेमा लोकतन्त्र संकटमा पर्ने भन्दै यसप्रति सचेत हुनुपर्नेमा जोड दिए।
अर्को प्रसंगमा उनले वर्तमान सरकार परिवर्तन गर्नुपर्ने आफ्नो सोच नरहेको तर सरकारले पारदर्शी र जवाफदेही भएर काम गर्नुपर्ने बताए।
उनले भने, ‘वर्तमान गठबन्धन सरकारप्रति नेपाली जनताको ठूलो आशा र भरोसा रहेकाले नागरिकको जीवनस्तर वृद्धिको अनुभूति हुने खालको कार्य गर्नुपर्छ।'
नेता डा. कोइरालाले मुलुकमा प्रजातन्त्र प्राप्तिका लागि यदुनाथ चापागाईले खेल्नु भएको भूमिकाबारे चर्चा गर्दै सबैले त्यसको अनुशरण गर्नुपर्ने बताए।
पुस्ताकालयका अध्यक्ष रन्जितप्रकाश बुढाथोकी, पूर्वअध्यक्ष दिपक चापागाई तथा साहित्यकार दिनेशराज सुवेदीले गुराँस पुस्कालयको महत्त्व र प्रजातन्त्र स्थापनाका लागि चापागाईं परिवारको भूमिका विषयमा धारणा राखे।
विं.सं. २०२७ सालमा विराटनगर ४ वरगाछीमा पुस्तकालय स्थापना गरिएको थियो। कार्यक्रममा पूर्वमन्त्री हरि सापकोटा, मोहम्मद अन्सारी र डा. प्रमिला गच्छदारलाई सम्मान गरिएको थियो।
