काठमाडौंको भृकुटीमण्डपस्थित नेपाल पुलिस क्लब प्रांगणमा नेपाल शाकाहारी संघले आयोजना गरेको अहिंसा महोत्सव नेपाल सञ्चालन भइरहेको छ। महोत्सवले शाकाहार, भेगान जीवनशैली र करुणामुखी सोचलाई एकै थलोमा दर्साएको छ।
प्रवेशद्वारमै पशु बलि तथा पशु हत्या निषेध सचेतना अभियान’ लेखिएको पर्चा हातमा थमाइन्छ। त्यो पर्चाले नै महोत्सवको मुख्य सन्देश स्पष्ट गर्छ– जीवनका प्रत्येक अभ्यासमा अहिंसा र करुणालाई अपनाउने।
महोत्सवमा विभिन्न स्टल र प्रदर्शनी राखिएका छन्। प्राकृतिक सफाइका उपाय देखाउने स्टलदेखि ध्यान अभ्यासबारे जानकारी दिने कक्ष, पशु अधिकार र उद्धारका अभियान, पुस्तक बिक्री, इको आर्ट एक्जिबिसन र भेगान खानाका स्वाद चखाउन पाइने ठाउँसम्म सबैलाई केही न केही देख्न र बुझ्न मिल्छ। तर, यी सबै प्रयासको अन्तिम सार एउटै हो – हिंसा रहित जीवनशैली सम्भव छ, र त्यो हामी सबैको रोजाइ हुन सक्छ।
उत्सवमा घुम्ने जो–कोहीले देख्छन्, यो केवल उत्पादन वा परिकारको मेला मात्र होइन। यो त चेतना, जीवनशैली र मूल्यहरूको प्रदर्शनी हो। आयोजकले चाहेजस्तै, मानिसलाई पशुमा पनि अधिकार छ भन्ने कुरा सम्झाउने र प्रकृतिसँग सहअस्तित्वमा बस्न प्रेरित गर्ने प्रयास छ।
नेपाल शाकाहारी संघले अघि सारेको यो पहलले उपभोगभन्दा करुणा र सहअस्तित्वलाई प्राथमिकता दिने बाटो देखाएको छ। हिजो सुरु भएको यो महोत्सव भोलिसम्म चल्नेछ, तर यसको सन्देश भने सहभागीहरूको जीवनशैलीमा लामो समयसम्म बाँकी रहने अपेक्षा गरिएको छ।
