काठमाडौं। भरोसायुक्त बाटो नहुँदासम्म दसैंका लागि अग्रिम टिकट बुकिङ खुल्ला गर्न सक्ने अवस्था नरहेको सार्वजनिक यातायात व्यवसायीले बताएका छन्।
मनसुन रहँदै यो वर्षको दसैं पर्ने भएकाले भरोसायुक्त बाटो नहुँदासम्म दसैंका लागि अग्रिम टिकट बुकिङ खुल्ला गर्न सक्ने अवस्था नरहेको नेपाल राष्ट्रिय यातायात व्यवसायी महासंघका वरिष्ठ उपाध्यक्ष सरोज सिटौलाले बताएका हुन्।
सरकारले महिना दिनआगवै अग्रिम टिकट बुकिङ खुलाउँदै आएको छ। तर, यो वर्ष दसैं आउन २८ दिन मात्रै बाँकी हुँदा पनि टिकट खुलाउने पहल गर्न सकेको छैन। अन्य वर्षको तुलनामा यो वर्ष दसैं मनसुनमै हुने देखिन्छ।
टिकट खुलाउनुभन्दा सडक मर्मत सम्भार आवश्यक रहेको सार्वजनिक यातायात व्यवसायले बताएका छन्। ‘छलफल भएको छैन, हामीले मनसुनलाई हेरिरहेका छौँ,’ उपाध्यक्ष सिटौलाले भने, ‘सकरारी निकायले छलफल गरेको छैन, मुख्य त सडक हो।’
वरिष्ठ उपाध्यक्ष सिटौलाले दसैंका लागि सरकारले सडक मर्मत सम्भार गर्न सके आफूले टिकट खुलाउने बताएका छन्। ‘हामी दसैंमा आमनगारिकलाई जसरी पनि पुर्याउने छौँ,’ उनले भने, ‘सडकको सहज वातावातरण सरकारको मिलाउने हो। हालसम्म यसबारे कुनै किसिमको छलफल हुन सकेको छैन। भरोसायुक्त बाटो नबनाइकन यो टिकट खुल्ने अवस्था रहँदैन।’
यता, यातायात व्यवस्था विभागका महानिर्देशक राजिव पोखरेलले टिकट खुलाउने विषयमा कुनै छलफल हुन नसकेको बताएका छन्। उनले सकेसम्म छिटो नै यो विषयमा छलफल हुने उल्लेख गरेका छन्।
सरकारले पर्व लक्षित सडक मर्मत-सम्भार सुरु गरेको छ। देशका मुख्य राजमार्गमा भएका खाल्डा-खुल्डी मर्मत सम्भारको काम सुरु गरिएको सडक विभागले जनाएको छ। चाडपर्व लक्षित सडक मर्मत कार्य योजना तयार गरी सडक मर्मत सम्भार सुरु गरेको प्रवक्ता तथा उप-महानिर्देशक ई.प्रभात कुमार झा बताएका छन्।
उनका अनुसार भाद्र अन्तिम सातााट मसान्तसम्म खाल्डा-खुल्डी पुर्ने कार्य सम्पन्न हुने गरी आफू लागि परेको बताएका छन्।
