काठमाडौं। नेपाल राष्ट्र बैंकका गभर्नर डा. विश्वनाथ पौडेलले अर्थतन्त्रको विकासमा लागि कानुनी स्पष्टता जरुरी रहेको बताएका छन्।
बिहीबार नेपाल आर्थिक पत्रकार समाज (सेजन)को नयाँ कार्यसमितिलाई स्वागत गर्ने क्रममा उनले कतिपय अवस्थामा कानुनी अस्पष्टता हुँदा काम गर्न समस्या भएकाले कानुनको भावअनुसारको स्पष्टता हुनु जरुरी भएको उल्लेख गरे।
मुलुकमा पछिल्लो समय उत्पन्न परिस्थितिबाट अगाडि बढ्ने क्रममा आइपर्ने समस्या समाधानका लागि पनि कानुनी स्पष्टता जरुरी रहेको उनको भनाइ थियो। ‘कानुनको स्पष्टता सबै क्षेत्रमा आवश्यक पर्छ, विशेषगरी पत्रकारले समाचार लेख्ने क्रममा कानुनको व्याख्या राम्रो नभए भने गलत सन्देश जाने जोखिम हुन्छ। यसमा सबै सचेत हुनुपर्छ’, उनले भने।
नागरिकसँग अन्तरक्रिया गर्न पत्रकारिता महत्त्वपूर्ण माध्यम हुने उल्लेख गर्दै उनले सेजनसँगको सहकार्यका लागि केन्द्रीय बैंक तयार रहेकोसमेत बताए।
जेनजी प्रदर्शनका क्रममा क्षतिग्रस्त संरचना पुनःनिर्माणका लागि स्रोत अभाव नहुने उनले उल्लेख गरे। ‘पुनःनिर्माणका लागि ठूलो स्रोत आवश्यक छ। यद्यपि त्योभन्दा महत्त्वपूर्ण विषय सुशासन र प्रशासनिक कार्यक्षमतामा सुधार हो’, उनले भने।
प्रदर्शनका क्रममा निजी क्षेत्रमाथि आक्रमण हुनुले व्यवसायीमा चिन्ता थपिए पनि अब मनोबल उच्च बनाउँदै अगाडि बढ्नुको विकल्प नभएको उनको धारणा छ।
प्रदर्शनका क्रममा कैयौं निजी व्यापारिक भवनमा क्षति पुगेको छ, तर अब हाम्रो प्राथमिकता स्वदेशमा लगानीक वातावरण निर्माण गरी विदेशी लगानी आकर्षित गर्नमा हुनुपर्छ। त्यसैले सुरुमा स्वदेशी लगानीलाई यहीँ रोक्ने वातावरण बनाउन सकियो भने अर्थतन्त्रमा गतिशील हुन लामो समय लाग्दैन’, गभर्नर पौडेलले भने।
उनले अर्थतन्त्रको विकासका लागि राजनीतिक स्थायित्व, लगानीमैत्री वातावरण, निजी क्षेत्रको मनोबलमा अभिवृद्धि आवश्यक भएकोसमेत उल्लेख गरे। व्यवसाय जोगाउन अर्थतन्त्रको प्रणालीमै सुधार जरुरी रहेको उनको भनाइ थियो।
