अर्थमन्त्री खनाल र आइएमएफ नेपाल मिसन प्रमुखबीच भर्चुअल बैठक, आर्थिक सहयोग निरन्तर रहने

अर्थतन्त्र

गृहपृष्ठ
अर्थतन्त्र

अर्थमन्त्री खनाल र आइएमएफ नेपाल मिसन प्रमुखबीच भर्चुअल बैठक, आर्थिक सहयोग निरन्तर रहने

क्यापिटल नेपाल सोमबार, असोज ६, २०८२

काठमाडौं। अर्थमन्त्री रामेश्वर खनाल र अन्तर्राष्ट्रिय मुद्रा कोषका नेपाल मिसन प्रमुख जहान सार्वतबीच आज भर्चुअल बैठक भएको अर्थ मन्त्रालयले जनाएको छ।

बैठकमा मिसन प्रमुख सार्वतले हालै नेपालमा विकसित राजनीतिक घटनाक्रमले अर्थतन्त्रमा पार्न सक्ने प्रभाव र आर्थिक सुधारका कार्यक्रमको निरन्तरताका विषयमा अर्थमन्त्रीसँग छलफल गरे।

अर्थमन्त्री खनालले विशिष्ट परिस्थतिमा गठन भएको वर्तमान सरकारको मुख्य कार्य जिम्मेवारी तोकिएको समयमा प्रतिनिधिसभाको निर्वाचन सम्पन्न गर्नु रहेको र हालै जेनजी युवाको नेतृत्वमा भएको प्रदर्शनका क्रममा व्यक्त सुशासन र स्वदेशमा नै रोजगारी सिर्जना गर्ने विषयमा सरकार कटिबद्ध रहेको जानकारी गराएका थिए।

मन्त्री खनालले अन्तर्राष्ट्रिय मुद्रा कोषसमेतको सुझावमा कार्यान्वयनमा रहेका आर्थिक सुधारका कार्यक्रमलाई थप तीव्रता दिइने जानकारी गराए। मुद्रा कोषको सहयोगमा कार्यान्वयन भइरहेको एक्सटेन्डेड क्रेडिट फ्यासिलिटी कार्यान्वयन अवस्था समीक्षा गरी छैटौं समीक्षा प्रतिवेदन छिट्टै अन्तर्राष्ट्रिय मुद्रा कोषको बोर्ड बैठकमा पेस गर्ने विषयमा छलफल भएको मन्त्रालयले बताएको छ।

अन्तर्राष्ट्रिय मुद्रा कोषका मिसन प्रमुख जहानले नेपालमा आर्थिक सुधारका कार्यक्रममा नयाँ सरकारसँग मिलेर काम गर्न तयार रहेको जानकारी गराए। उक्त अवसरमा अन्तर्राष्ट्रिय मुद्रा कोषका नेपालस्थित आवासीय प्रतिनिधि प्रणव गुप्तासमेत उपस्थित थिए।

प्रकाशित मिति: सोमबार, असोज ६, २०८२ १३:३५

प्रतिक्रिया दिनुहोस्