काठमाडौं। अमेरिकी इतिहासमा सबैभन्दा लामो मानिएको सरकारी सटडाउन हट्ने देखिएको छ। आइतबार पुनः सिनेट बैठक बसेर समस्या समाधान गर्न सत्तारुढ रिपब्लिकन र डेमोक्र्याट सहमत भएसँगै ४० िन लामो सटडाउन अन्त्यको संकेत देखिएको अन्तर्राष्ट्रिय सञ्चार माध्यमले जनाएका छन्।
बैठकमा सदनले पारित गरेको खर्च विधेयकलाई अगाडि बढाउने वा नगर्ने निर्णय गर्दै सरकार पुनः सञ्चालन गर्ने बाटो खुलाउने उद्देश्यले वार्ता भइरहेका छन्। अमेरिकी संविधानअनुसार सिनेटमा निरन्तर प्रस्ताव अघि बढाउन कम्तीमा ६० मत आवश्यक पर्छ।
यो द्विदलीय सहमतिलाई केन्द्रमा राखिएको प्रयासले हप्तौं लामो गतिरोध अन्त्य गर्ने सम्भावना देखाएको छ। सीबीएस न्यूजका अनुसार मतदानअघि सिनेटमा एउटा सहमति भएको थियो, जहाँ कम्तीमा आठ डेमोक्रेट सिनेटर कोषसम्बन्धी प्रस्तावलाई समर्थन गर्न तयार थिए। यो सहमति सिनेट रिपब्लिकन, मध्यमार्गी डेमोक्रेट र ह्वाइट हाउसबीचको केही दिनदेखिको वार्ताबाट सम्भव भएको हो।
सिनेटका बहुमतका नेता जोन थुनले सदनद्वारा पारित प्रस्तावलाई अघि बढाउने र त्यसपछि ‘मिनीबस’ भनेर चिनिने व्यापक विनियोजन प्याकेजमार्फत लामो अवधिको सरकारी कोष विस्तार गर्ने रणनीति तयार पारिरहेको बताइएको छ। सिनेटका विनियोजनकर्ताले आइतबार तीन दीर्घकालीन खर्च विधेयकको पाठ सार्वजनिक गरेका छन्। उक्त विधेयकले जीओपीको सटडाउन समाधान योजनाको आधार बनाएको छ।
सीएनएनका अनुसार यो सम्झौता सिनेटका नेता थुन, ह्वाइट हाउस र डेमोक्रेटिक सिनेटर जीन शाहिन (न्युह्याम्पशायर), म्यागी हसन (न्युह्याम्पशायर) र स्वतन्त्र सिनेटर एंग्गस किङ (माइन)बीच भएको हो। सम्झौतामा डेमोक्रेटको पुरानो मागअनुसार स्वास्थ्य बिमा कर क्रेडिट विस्तार गर्ने भविष्यको मतदानसमेत समावेश गरिएको छ।
राष्ट्रपति डोनाल्ड ट्रम्पले पत्रकारसँग कुरा गर्दै सटडाउन अन्त्य हुने आशा प्रकट गरेका छन्। उनले भने, ‘हामी सटडाउन अन्त्य नजिकै छौं। हामीले अवैध आप्रवासीलाई कुनै पनि रकम दिने सहमति गरेका छैनौँ र मलाई लाग्छ, डेमोक्रेटले अब यो बुझिसकेका छन्। चाँडै समाधान हुनेछ।’
सीएनएनका अनुसार सम्भावित सम्झौताले सरकार पुनः सञ्चालन गर्न अस्थायी ‘स्टपग्याप’ उपायमार्फत जनवरीसम्म कोष विस्तार गर्नेछ। यो प्रमुख संघीय एजेन्सीलाई बजेट प्रदान गर्ने ठूलो विनियोजन प्याकेजसँग जोडिएको छ। आइतबार साँझ ८ः३० देखि ९ बजे (स्थानीय समय) बीच मतदान हुने अपेक्षा गरिएको थियो।
सिनेटका डेमोक्रेटिक नेताहरूले अहिलेसम्म सार्वजनिक रूपमा सहमत समर्थन जनाएका छैनन्। तर, हाउस डेमोक्रेटले प्रस्तावित सम्झौताप्रति कडा आलोचना गर्दै सोमबारका लागि आफ्नै ककस बैठक बोलाएका छन्। यदि प्रस्ताव पारित भयो भने सिनेटले हाउस–पारित स्टपग्याप विधेयकमाथि मतदान गर्नेछ। कम्तीमा आठ डेमोक्रेटको समर्थन जुटेपछि यसमा व्यापक कोष प्याकेज समावेश गरी अन्तिम पारितिका लागि पुनः सदनमा पठाइनेछ।
दुवै सदनबाट अनुमोदन भएपछि विधेयक राष्ट्रपति ट्रम्पको डेस्कमा पुग्नेछ, जसले एक महिनाभन्दा बढी समयदेखि संघीय सेवा क्षतविक्षत भएको सटडाउन अन्त्य गर्नेछ। यद्यपि, सम्पूर्ण प्रक्रिया पूरा हुन अझ केही दिन लाग्ने देखिन्छ।–एजेन्सी
