काठमाडौं। एक जमाना यस्तो थियो, जतिबेला मानिस कोदोको ढिँडो लुकाएर खान्थे, अथवा ढिँडो खाएको कुरा खुलेआम भन्न रुचाउँदैथे। गाउँघरमा समेत यस्तै अवस्था थियो। किनभने, ढिँडो गरिबको खान्की हो भन्ने मानसिकता थियो।
त्यो समय चामलको भात धनी अर्थात् सम्पन्नले र कोदो गरिबले खान्छन् भन्ने थियो। यसकारण गाउँघरमा कतैकतै त घरभित्र ढिँडो खाने र बाहिर कुकुरलाई चाहिँ एक गाँस दूधभात दिने गरेको तथ्य पनि सुन्न पाइन्थ्यो।
अहिले जमाना बदलिएको, छ, समय फेरिएको छ । मानिस गाउँघरको त के कुरा सहर बजारका ठूलै होटलमा पनि ढिँडो खोज्दै जान थालेका छन्। ढिँडो अब लुकेर र लुकाएर खाने खान्की नभएर मन पर्ने खाना मात्र नभएर रोजाइको खानामा पर्न थालेको छ। त्यसैले मानिसले अहिले ढिँडो खाँदा गर्व गर्छन् र सामाजिक सञ्जालमा आज ढिँडो खाइयो भनेर तस्बिर पोस्ट गर्ने गर्छन्।
पहिले दुर्लभ मानिएको भात अहिले विकल्पको खाना भएको छ। घरमा होस् या होटलमा, मानिसले सकेसम्म भात खाँदैनन्। रोटी, च्याख्ला या ढिँडो नै रोजाइमा पर्न थालेको छ। पहिलेको धनीमानी तथा सानको खाना भातलाई अहिले मानिस रोगको घरका रुपमा लिन्छन्। किनभने, चिकित्सक नै धेरै भात नखान सुझाउँछन्। सकेसम्म अर्गानिक खाना, रैथाने उत्पादनको खान्की र सकेसम्म भात थोरै खानुपर्ने चिकित्सकको सल्लाह छ।
पहिलेको तुलनामा अहिले मानिसमा आफ्नो स्वास्थ्यसम्बन्धी चेतनामा वृद्धि भएको देखिन्छ। त्यसैले मानिस विषादी प्रयोग नभएको, रैथाने उत्पादन तथा कार्बाेहाइड्रेट धेरै नभएका खानेकुरा रोज्न थालेका छन्।
खाद्य, पोषण तथा जनस्वास्थ्यविद् डा अरुणा उप्रेती पछिल्लो समय पहिलेका रैथाने अन्न जस्तै कोदो, फापर, गुद्रुक, मकै तथा च्याख्ला र दाल भात धेरैको रोजाइमा पर्न थालेको बताउँछन्। रक्तचाप, मधुमेहलगायत रोगबाट जोगिनका लागि पनि बजारका र आधुनिक खानेकुराभन्दा रैथाने खाना नै खानुपर्छ भन्ने चेतना मानिसमा बढ्दै गएको उनको अनुभव छ।
‘पहिला रैथाने खाना खाँदा अपहेलित हुने अवस्था पनि थियो। तर, अहिले त्यस्तो छैन। सञ्चार माध्यमले गर्दा रैथाने खानातर्फ मानिस आकर्षित भएका छन्। पहिला मैले कोदो खाएँभन्दा मान्छेलाई अपमान महसुुस पनि हुने गरेको थियो। अहिले भने पाँचतारे होटलमै पनि कोदो, फापरको रोटी ढिँडो पाउन सकिन्छ। मेन्यूमै पनि यस्ता परिकार लेख्न थालिएको देखिन्छ’, उनी भन्छन्।
मानिसमा शारीरिक व्यायाम आदि कम हुँदै गएको र बजारका खानेकुराको मात्रा बढ्दै गएकाले अर्गानिक तरिकाबाट उत्पादन गरिएका यस्ता स्थानीय, रैथाने खानाले स्वास्थ्यलाई राम्रो गर्ने उनको सुझाव छ। केही वर्ष पहिले मेडिकल व्यवसायी दुर्गा प्रसाईंले झापास्थित आफ्नो घरमा नेपाल कम्युनिस्ट पार्टीका तत्कालीन नेताद्वय एवं पूर्वप्रधानमन्त्रीद्वय केपी शर्मा ओली र पुष्पकमल दाहाल ‘प्रचण्ड’लाई मार्सी चामलको भात खुवाएको विषयले चर्चा पायो।
प्रसाईंले दुई पूर्वप्रधानमन्त्रीसँगै बसेर मार्सी चामलको भात खाएको फोटो सार्वजनिक भएसँगै बजारमा मार्सी चामलको चर्चा चुलियो। मार्सी चामलको ‘ब्रान्डिङ’ गरेर अहिले ललितपुरको झम्सिखेलमा ‘मार्सी थकाली’ सञ्चालनमा आएको छ।
मार्सी धान विशेषतः चिसो हावापानीमा उत्पादन हुने धान हो। चिसो हावापानीमा उत्पादन हुने भएकाले मार्सी चामलको खाना स्वादिलो हुने गरेको छ। मार्सी थकालीका सञ्चालक मधुसुदन ढकाल हिमाली क्षेत्रमा उत्पादित हुने धानलाई आफ्नो रेस्टुरेन्टले ‘ब्रान्ड’ बनाएर अगाडि बढाएको बताउँछन्।
मार्सी थकालीमा मार्सी खानासहित स्थानीय स्तरमा उत्पादित गुन्द्रुक, कालिज, बँधिया कुखुरा, बट्टाई, च्यांग्र्राको सुकुटी, गँगटा, घुँगी, लोकल कुखुरालगायत रैथाने स्वाद लिन पाइन्छ।
लाजिम्पाटस्थित बुकी बुटिक होटलका व्यवस्थापक मनिष श्रेष्ठ केही वर्षअघिसम्म मानिस होटलमा विशेषगरी भात खान आउने गरेकामा अहिले उनीहरुको खानपिनमा निकै परिवर्तन आएको आफूले पाएको अनुभव सुनाउँछन्।
माानिस बढी त लोकल अथवा रैथाने उत्पादनमा नै बढी आकर्षित हुने गरेको बताउँदै श्रेष्ठ भात नै खोजे पनि मानिसले मार्सी चामल या अरु त्यस्तै रैथाने चामलको भात खोज्ने नत्र ढिँडोलगायत अरु खानेकुरा मन पराउने गरेको बताउँछन्।
त्यसैले आफूले स्थानीय उत्पादन, मार्सी चामलको थाली, लोकल कुखुरा तथा गाउँघरबाटै रैथाने गेडागुडी, कालो मासको दाल र लोकल सागहरु मगाउने गरेको उनको भनाइ छ। यही कारणले अहिले सो होटल परिसरमा हरेक शनिबार बिहान स्थानीय एवं रैथाने उत्पादन जस्तै जुम्लाको सिमी, मुस्ताङको आलु, जुम्ली मार्सी चामल, फापर एवं काठमाडौंकै पनि काँठतिरका सागसब्जी र गेडागुडीका अर्गानिक उत्पादनको बजार लाग्ने गरेको श्रेष्ठ बताउँछन्।
सेफ्स एसोसिएसन नेपालका पूर्वअध्यक्ष एवं नागार्जुनस्थित नागार्जुन रिसोर्टका सल्लाहकार सेफ गोविन्दनरसिंह केसी रैथाने खाना खानेको संख्या पछिल्लो समय बढ्दै गएको सुनाउँछन्।
‘पहिले त होटलमा गएर खाने भनेको ठूलाबडाले मात्र हो भन्ने थियो, किनभने मानिससँग पैसा नै हुँदैनथ्यो । कहिलेकाहीँ होटल जानेले पनि रैथानेभन्दा पनि होटलको आधुनिक परिकार नै खोज्थे। तर, अहिले त्यस्तो छैन। मानिस ठूलै होटलमा गएर पनि अर्गानिक तथा रैथाने खाना खोज्ने गरेका छन्। योचाहिँ स्वास्थ्यसम्बन्धी एक प्रकारको चेतना पनि हो’, उनी भन्छन्।
विगतमा सोल्टी होटलको सेफसमेत रहेका केसी पहिले अहिलेजस्तो तरकारी आदिमा विषादी प्रयोग गर्ने चलन नरहेकाले होटलको खाना पनि त्यति अस्वस्थ हुँदैनथ्यो भन्छन्।
केसीको अनुभवमा अहिले उत्पादन बढाउन अनेकथरी औषधी, मल प्रयोगले गर्ने र यस्ता समाचारले मानिसमा चेतना बढेको बताउँदै काठमाडौंका मानिस रैथाने खाना तथा स्थानीय उत्पादन खोज्दै अहिले नागार्जुन रिसोर्टजस्तै काँठ क्षेत्रका होटलमा पुग्ने गरेका छन्।
काठमाडौंको डाँडागाउँस्थित रोयल भिल्ला रिसोर्टका सञ्चालक पुष्कल मल्लको अनुभव पनि त्यस्तै छ। काठमाडौंको भीडभाडबाट केही पर जंगल नजिक रहेको आफ्नो रिसोर्टमा पनि स्थानीय एवं नेपाली स्वादका खानामा ‘इन्जोय’ गर्न मानिस आउने गरेको बताउँछन्।
‘पछिल्लो समय नेपाली खानाप्रति मानिसको रुचि बढेको देख्छु । हामीकहाँ पनि धेरै गेस्ट काठमाडौंबाटै आउनुहुन्छ र नेपाली मात्र नभएर रैथाने र अर्गानिक खाना नै खोज्नुहुन्छ, ढिँडो, गुद्रुक, सिस्नु फापर, मार्सी चामलको भात, लोकल कुखुराको झोल आदि खाने प्रचलन अहिले धेरै बढेको छ । धेरैको रोजाइ टिपिकल खाना पर्ने गर्दछ’, मल्ल भन्छन्।
केही वर्षयता राजधानी काठमाडौं सहरभित्रभन्दा पनि काँठ क्षेत्रमा बढी नै मात्रामा होटल रेस्टुरेन्ट खुलेका छन्। ती होटलमा सहरका तुलनामा धेरै पाहुना जाने गरेको सञ्चालकको अनुभव छ।
राजधानी काठमाडौंबाहेक नेपालको प्रमुख पर्यटकीय नगरी पोखराको विमानस्थल नजिक रहेको ‘एयरपोर्ट’ थकाली, चिप्लेढुंगाको मन्त्र थकाली, फेवाताल ड्यामसाइडस्थित मोनालिसा थकाली, पोखराको नौडाँडामा रहेको भण्डारी भान्साघर, चितवनको भरतपुरस्थित पाते ढिँडो थकाली, भरतपुरमै रहेको बाजेको माछा महललगायत थुप्रै होटल तथा रेस्टुरेन्टले पारखीलाई स्थानीय रैथाने खानाको स्वाद चखाइरहेका छन्।–रासस
-1763456516.jpeg)
-1763452680.jpeg)
