जर्मनीको शीर्ष व्यापारिक साझेदार बन्यो चीन, कर वृद्धिले अमेरिकासँगको व्यापारमा गिरावट

अन्तर्राष्ट्रिय

गृहपृष्ठ
अन्तर्राष्ट्रिय

जर्मनीको शीर्ष व्यापारिक साझेदार बन्यो चीन, कर वृद्धिले अमेरिकासँगको व्यापारमा गिरावट

क्यापिटल नेपाल बिहीबार, मंसिर ४, २०८२

काठमाडौं। अमेरिकी राष्ट्रपति डोनाल्ड ट्रम्पले करवृद्धि नीति सुरु गरेपछि जर्मनी चीनको शीर्ष व्यापारिक साझेदारको रूपमा पुगेको अन्तर्राष्ट्रिय सञ्चार माध्यमले जनाएका छन्।

जर्मनीको संघीय तथ्यांक निकाय डेस्टाटिसका अनुसार यस वर्षको जनवरीदेखि सेप्टेम्बरसम्म युरोपको सबैभन्दा ठूलो अर्थतन्त्र र चीनबीचको कुल व्यापार सामान्य बढेर १८६ अर्ब युरो (झन्डै २१५ अर्ब अमेरिकी डलर) पुगेको छ। यसै अवधिमा जर्मनी र अमेरिकाबीचको व्यापार करिब चार प्रतिशतले घटेर १८५ अर्ब युरोमा झरेको छ।

चीन सन् २०१६ देखि २०२३ सम्म जर्मनीको शीर्ष व्यापारिक साझेदार थियो। तर, बर्लिनले चीनमाथिको आर्थिक निर्भरता कम गर्ने प्रयास गरेपछि सन् २०२४ मा अमेरिका शीर्ष स्थानमा पुगेको थियो।

आइएनजीका अर्थशास्त्री कास्र्टेन ब्रेजेस्कीले यो घटनाक्रमले ‘अमेरिकी करले अमेरिकातर्फ जर्मनीको निर्यातमा पारेको नकारात्मक प्रभावलाई प्रतिबिम्वित गर्ने बताए। जुलाई सम्झौताअन्तर्गत अमेरिकामा ईयू निर्यातले १५ प्रतिशतको आधारभूत करको सामना गर्नुपर्नेछ, जुन ट्रम्प कार्यकालमा फर्कनुअघिभन्दा धेरै बढी हो।

जर्मन अर्थतन्त्र र विशेष गरी उद्योगको लागि सेमिकन्डक्टर बनाउन आवश्यक पर्ने दुर्लभ खनिज र चीनबाट प्राप्त अन्य आपूर्तिका सामानमा निरन्तर निर्भरता देखाउने अर्थशास्त्री कास्र्टेनको भनाइ छ।

एलबिबडब्ल्यू बैंकका विश्लेषक जेन्स–ओलिभर निकलासले चीनलाई अब व्यापारिक साझेदारभन्दा प्रतिस्पर्धीका रूपमा बढी हेरिने बताए। अर्थमन्त्री लार्स क्लिङबील यस साता चीनको भ्रमणमा रहेको समय यो समाचार प्रकाशित भएको हो।–एजेन्सी

प्रकाशित मिति: बिहीबार, मंसिर ४, २०८२ ०७:३२

प्रतिक्रिया दिनुहोस्