पाँच महिनामा करिब २९ अर्ब बिमा दाबी भुक्तानी, अझै ५५ अर्ब बाँकी

बैंकिङ

गृहपृष्ठ
बैंकिङ

पाँच महिनामा करिब २९ अर्ब बिमा दाबी भुक्तानी, अझै ५५ अर्ब बाँकी

क्यापिटल नेपाल मंगलबार, पुस १५, २०८२

काठमाडौं। चालू आर्थिक वर्ष २०८२/८३ को पहिलो ५ महिना अर्थात् मंसिरसम्म बिमा कम्पनीले २८ अर्ब ८३ रुपैयाँ बढी दाबी भुक्तानी गरेको नेपाल बिमा प्राधिकरणले सार्वजनिक गरेको पछिल्लो विवरणमा उल्लेख छ।

विवरणअनुसार बिमा कम्पनीले चालू आर्थिक वर्षको मंसिरसम्म २८ अर्ब ८३ करोड ६७ लाख रुपैयाँ दाबी भुक्तानी गरेका हुन्। जीवन बिमा कम्पनीले १८ अर्ब ४२ करोड २६ लाख रुपैयाँ भुक्तानी गरेका छन्। ९० हजार ४१४ वटा दाबीको भुक्तानी गरिएको हो।

अघिल्लो वर्ष ८६ हजार ३०७ वटा दाबीको १७ अर्ब २७ करोड ८७ लाख रुपैयाँ भुक्तानी भएको प्राधिकरणको तथ्यांक छ। अघिल्लो वर्षको तुलनामा समीक्षा अवधिमा जीवन बीमकको दाबी भुक्तानी संख्या ४.७६ प्रतिशत र रकम ६.६२ प्रतिशतले बढेको छ।

चालू आवको मंसिरसम्म निर्जीवन बिमा कम्पनीले १० अर्ब ४१ करोड ४१ लाख भुक्तानी गरेका छन्। यो भुक्तानी ५६ हजार २४० वटा दाबीको हो। अघिल्लो वर्ष यही अवधिसम्म निर्जीवन बिमा कम्पनीले ५२ हजार १४५ वटा दाबीको ७ अर्ब ७४ करोड ७५ लाख भुक्तानी गरेका थिए।

अघिल्लो वर्षको तुलनामा समीक्षा अवधिमा निर्जीवन बीमकहरुको दाबी संख्या र रकम क्रमशः ७.८५ प्रतिशत र ३४.४२ प्रतिशतले बढेको छ। गत भदौको जेनजी आन्दोलन र असोजको बाढीपहिरोले ठूलो भौतिक क्षति पुर्याएका कारण निर्जीवन बिमा दाबी भुक्तानी रकम बढेको हो।

तथ्यांकअनुसार चालू आव मंसिरसम्म जीवन र निर्जीवन बिमा कम्पनीले अझै ५४ अर्ब ८९ करोड २८ लाख रुपैयाँ दाबी भुक्तानी गर्न बाँकी छ। यसमध्ये जीवन बिमा कम्पनीले ५८ हजार ६४६ वटा दाबीको ५ अर्ब ९ करोड ४९ लाख र निर्जीवन बीमकले ४९ अर्ब ७९ करोड ७९ लाख छ। यो १ लाख ९ हजार ९०० वटा दाबीको हो।

प्रकाशित मिति: मंगलबार, पुस १५, २०८२ १३:४७