काठमाडौं। काठमाडौं महानगरपालिका–८ ले १५० मै एक्स–रे सेवा सुरु गरेको छ।
जयबागीश्वरीस्थित वडा कार्यालय परिसरमा स्थापना गरिएको एक्स–रे कक्ष उद्घाटन गर्दै महानगरा उपप्रमुख सुनिता डंगोल र वडाध्यक्ष एवं कामपा सम्पदा तथा पर्यटन समिति संयोजक आशामान संगतले संयुक्त रुपमा सेवा सुरु गरेका हुन्।
उक्त सेवा सञ्चालनका लागि ३२ लाखमा अत्याधुनिक मेसिन एक्स–रे मेसिन खरिद गरिएको हो। उपप्रमुख डंगोलले, आधारभूत र आकस्मिक स्वास्थ्य सेवाको पहुँचलाई सरल, सहज र गुणस्तरीय बनाउँदै लैजाने क्रममा एक्स–रे सेवा थप गरिएको बताइन्।
‘माग र आवश्यकताका आधारमा सेवालाई विस्तार र सुदृढ बनाउँदै लैजानेछौँ। आधारभूत स्वास्थ्य सेवाबाट कसैले पनि वञ्चित हुनु नपर्ने अवस्था बनाउँछौँ’, उनले भनिन्। वडाअध्यक्ष संगतले मानव संशाधन, प्रविधि र उपकरण थप गर्दै लैजाने योजना रहेको बताए। उनका अनुसार कामपाबाट सञ्चालन भएको एक्स–रे सेवा प्रदान गर्ने यो पहिलो वडा हो।
विभागको भण्डार शाखा प्रमुख कमलप्रसाद भट्टराईका अनुसार वडा नम्बर ७, ८, १०, १२, १४, १६, १९, २६, २७ र ३२ गरी १० वटा वडामा एक्स–रे सेवा जडान हुँदै छ। यसका लागि १० जना रेडियोग्राफर नियुक्त गरिसकिएको छ।
-1752216444.jpg)
