कांग्रेस केन्द्रीय कार्यसम्पादन समिति बैठक बस्दै, संस्थापनबाट विशेष महाधिवेशन ‘अस्वीकार’ प्रस्ताव लगिँदै

राजनीति

गृहपृष्ठ
राजनीति

कांग्रेस केन्द्रीय कार्यसम्पादन समिति बैठक बस्दै, संस्थापनबाट विशेष महाधिवेशन ‘अस्वीकार’ प्रस्ताव लगिँदै

क्यापिटल नेपाल सोमबार, पुस २१, २०८२

काठमाडौं। मंसिर अन्त्यमा सभापति शेरबहादुर देउवा नेतृत्वको केन्द्रीय कार्यसमिति कार्यकाल सकिए पनि निर्वाचनलाई वहाना बनाएर वैशाखसम्म तन्काइएपछि कांग्रेसभित्र नियमित महाधिवेशन कि विशेष महाधिवेशन विवाद अझै जारी छ।

यद्यपि, गत शनिबारको सानेपा बैठकले महामन्त्रीद्वय गगन थापा र विश्वप्रकाश शर्माबाट पेस गरिएको पुसमै महाधिवेशन गरिनुपर्ने प्रस्ताव अस्वीकार्दै वैशाखमा गर्ने निर्णयलाई सदर गरेको छ।

बहुमतका नाममा निर्णय गरिए पनि महामन्त्रीद्वयले पुसमै विशेष महाधिवेशन गरिने बताएपछि कांग्रेसमा किचलो झनै पेचिलो बनेको छ। यद्यपि संस्थापन इतर रहँदै आएका वरिष्ठ नेता शेखर कोइराला देउवा क्याम्पमा पसेपछि महामन्त्रीद्वयको माग केही कमजोर भएको ठानिएको छ।

संस्थापन पक्षले विशेष महाधिवेशनको औचित्य सकिएको तर्क गरिरहेका बेला आज केन्द्रीय कार्यसम्पादन समितिको बैठक आह्वान गरिएको छ।

पार्टीका मुख्य सचिव कृष्णप्रसाद पौडेलका अनुसार आगामी सोमबार दिउँसो १ बजे ललितपुरको बीपी नगरस्थित केन्द्रीय कार्यालय बीपी स्मृति भवनमा बैठक बस्ने तय भएको हो।

बैठकमा वर्तमान राजनीतिक अवस्था, पार्टीको आन्तरिक तथा समसामयिक विषयमा छलफल हुने बुझिएको छ। मुख्य सचिव पौडेलले बैठकमा उपस्थितिका लागि कार्यसम्पादन समितिका सबै पदाधिकारी एवं सदस्यलाई निर्देशानुसार अनुरोधसमेत गरेका छन्।

प्रकाशित मिति: सोमबार, पुस २१, २०८२ ०८:३४