नेकपा एमालेले तय गर्‍यो आन्दोलनको चरणबद्ध कार्यक्रम, वैशाख १२ मा काठमाडौंमा विशाल प्रदर्शन

राजनीति

गृहपृष्ठ
राजनीति

नेकपा एमालेले तय गर्‍यो आन्दोलनको चरणबद्ध कार्यक्रम, वैशाख १२ मा काठमाडौंमा विशाल प्रदर्शन

क्यापिटल नेपाल मंगलबार, चैत १७, २०८२

काठमाडौं। नेकपा (एमाले) सचिवालयको बैठकले पार्टी अध्यक्ष एवं पूर्वप्रधानमन्त्री केपी शर्मा ओली तथा पूर्वगृहमन्त्री रमेश लेखकको गिरफ्तारीविरुद्धको आन्दोलनलाई थप तीव्र बनाउँदै चरणबद्ध कार्यक्रम तय गरेको छ। बैठकले ओली र लेखकको गिरफ्तारीलाई प्रतिशोधपूर्ण र बदला–प्रेरित बताउँदै शान्तिपूर्ण आन्दोलनमाथि सरकारले प्रहरीमार्फत गरेको दमनको कडा भर्त्सना गर्‍यो।
यस्ता छन् घोषित कार्यक्रम
बैठकले चैत २५ गतेसम्म जिल्ला तहमा आन्दोलनकेन्द्रित बृहत भेला गर्ने निर्णय गरेको छ। त्यसपछि चैत २८ गते देशभरका सबै पालिकामा विरोध प्रदर्शन गरिने छ। वैशाख लागेपछि पनि कार्यक्रमको सिलसिला जारी रहनेछ। वैशाख ३ गते वडा तहमा भेला, वैशाख ७ गते सबै प्रदेश राजधानीहरूमा प्रदर्शन र वैशाख १२ गते राजधानी काठमाडौंमा विशाल विरोध प्रदर्शन गर्ने कार्यक्रम तय गरिएको छ।
जनसंगठनहरूलाई परिचालन गर्ने निर्देशन
बैठकले पार्टी आबद्ध सबै जनसंगठनहरूलाई आ–आफ्नो ढंगले आन्दोलनका कार्यक्रम सञ्चालन गर्न निर्देशन दिएको छ। विद्यार्थी तथा पेशागत संगठनसम्बन्धी सरकारी गतिविधिहरूलाई समेत आन्दोलनको एजेन्डामा समेट्ने निर्णय गरिएको छ। यसका लागि भोलि बिहान ११ बजे पार्टी कार्यालयमा जनसंगठन संयन्त्रको बैठक बस्ने जनाइएको छ।
जिम्मेवारी बाँडफाँड
सर्वपक्षीय नागरिक संवादको जिम्मेवारी पार्टी उपाध्यक्ष रघुजी पन्त, उपमहासचिव योगेश भट्टराई र केन्द्रीय सदस्य मीन बहादुर शाहीलाई दिइएको छ। त्यसैगरी संसद्भित्र दलहरूसँग सहकार्य र प्रभावकारी प्रस्तुतिको जिम्मेवारी उपाध्यक्ष राम बहादुर थापा ‘बादल’ र सचिव पद्मा अर्याललाई तोकिएको छ। संसदीय दलको बैठक भोलि दिउँसो ३ बजे पार्टी कार्यालयमा बस्ने कार्यक्रम रहेको छ। साथै, आन्दोलनका थप कार्यक्रम निर्धारण गर्न पार्टी केन्द्रीय कमिटीको बैठक तत्काल बोलाउने निर्णय पनि बैठकले गरेको छ।