एयरपोर्ट क्षेत्रका व्यवसायमा अनुगमनः ३ लाखसम्म जरिवाना, म्याद गुज्रिएको सामान भेटियो

समाज

गृहपृष्ठ
समाज

एयरपोर्ट क्षेत्रका व्यवसायमा अनुगमनः ३ लाखसम्म जरिवाना, म्याद गुज्रिएको सामान भेटियो

क्यापिटल नेपाल शुक्रबार, वैशाख ११, २०८३

काठमाडौं। काठमाडौंको एयरपोर्ट क्षेत्रका विभिन्न व्यवसाय तथा फर्ममाथि अनुगमन गर्दा उपभोक्ता संरक्षण ऐन उल्लंघन भएको पाइएपछि जरिवाना तथा कारबाही गरिएको छ। वाणिज्य, आपूर्ति तथा उपभोक्ता संरक्षण विभागले बिहीबार गरेको आकस्मिक निरीक्षणमा मूल्यसूची (एमआरपी) उल्लेख नगरी सामान बिक्री गर्ने, मूल्य स्टिकर छोपेर नयाँ टाँस्ने, दोहोरो मूल्य राख्ने, तोकिएकोभन्दा बढी मूल्य लिने तथा म्याद गुज्रिएको खाद्य रङ बिक्री गरेको पाइएको जनाएको छ।

विभागका अनुसार काठमाडौं महानगरपालिका–९, एयरपोर्ट क्षेत्रमा सञ्चालनमा रहेका सान इन्टरप्राइजेज प्रालि, ओरियण्टल होटल्स लि., टी थकाली थ्री, साई किरण इन्टरप्राइजेज र होटल सोनिगः प्रालिलाई उपभोक्ता संरक्षण ऐन, २०७५ अनुसार जनही ३ लाख रुपैयाँ जरिवाना गरिएको छ।

विभागले ती व्यवसायीहरूले ऐनको दफा १६ विपरीत कार्य गरेको ठहर गर्दै दफा ३८ (ङ) अनुसार कसुर कायम गरी दफा ३९(१)(ख) बमोजिम जरिवाना गरिएको जनाएको छ। साथै, केही व्यवसायलाई आवश्यक कागजातसहित २४ घण्टाभित्र विभागमा उपस्थित हुन निर्देशन दिइएको छ।

विभागले बजारमा स्वच्छता र प्रतिस्पर्धा कायम गर्न यस्ता अनुगमनलाई निरन्तरता दिने जनाएको छ।

प्रकाशित मिति: शुक्रबार, वैशाख ११, २०८३ १०:५१

प्रतिक्रिया दिनुहोस्